上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
希伯來書
13
上帝所歡喜的服事
著繼續相親相疼。
2 著會記得好款待出外人。因為有人按呢做，無意中接待著天使。
3 著關懷受關監的人，親像及𪜶啲同受關；著關懷受虐待的人，親像恁本身啲受虐待。
4 婚姻人人著尊重；著保持純潔的夫妻關係，因為上帝會審判私通行淫的人。
5 毋通貪財，家己所有的著知足，因為上帝有講：「我𣍐離開你，嘛𣍐放拺你。」
6 所以咱會當好膽講：
主是我的幫贊，我𣍐驚惶，
人會當給我按怎？
7 著數念引導恁，傳上帝的信息互恁的人，注意看𪜶的生活及結局來學習𪜶的信。
8 耶穌基督昨日、今日，直到永遠攏𣍐改變。
9 恁毋通互逐款奇異的教義導迷路，因為心靈較好著靠上帝的恩典來堅固，毋是靠食物。靠遵守食物規例的人攏無得著利益。
10 咱有一個祭壇，頂面的祭物佇會幕內服事的人無權通食。
11 𪜶的大祭司帶牲生的血進入至聖所為著人民贖罪，牲生的身軀卻佇營外燒。
12 所以，為著欲用家己的血互人民得著潔淨，耶穌嘛佇營外犧牲來死。
13 按呢，咱著出去營外，去伊遐，及伊同受凌辱。
14 因為佇遮咱無永久的城；咱是啲尋彼個啲欲來的城。
15 所以，咱著通過耶穌繼續將稱讚的祭獻互上帝，這是宣認主的名的人的嘴唇所結的果子。
16 著會記得做好事，互相幫贊，因為這是上帝所歡喜的祭物。
17 著服從引導恁的人，聽趁𪜶的話，因為𪜶不時啲看顧恁的靈魂，通互𪜶對上帝交代清楚。恁著互𪜶歡喜工作，無吐氣；若無，對恁無利益。
18 著繼續為著阮祈禱；阮確信家己有清白的良心，意愛凡事照起工生活。
19 我懇求恁著特別為著我祈禱，求上帝互我通較緊去恁遐。
祝福及最後的請安
20-21 上帝已經互咱的主耶穌對死人中閣活。伊通過耶穌所流的血確立永遠的約，互耶穌成做羊群的大牧者。願此位賜平安的上帝互恁佇逐項好事完全來行伊的旨意，通過耶穌基督佇咱中間成就伊所歡喜的事！願榮光歸互上帝，直到永永遠遠。阿們！
22 兄弟姊妹，我互恁的批無偌長，我勸恁耐心聽我勸勉的話。
23 我愛恁知，咱的兄弟提摩太已經出獄；伊若較早來，我會隨時及伊做夥去看恁。
24 請替我給恁所有的領導者及攏總的信徒請安。對意大利來的信徒嘛欲給恁請安。
25 願上帝的恩典及恁大家同在。阿們！
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。