上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
希伯來書
11
信
信是對所向望的事有把握，對無看見的事會當肯定。
2 古早人因為此個信得著上帝認定接納。
3 對信，咱知宇宙是對上帝的話創造的；按呢看會著的是對看𣍐著的來造的。
4 對信，亞伯比該隱獻較好的祭物互上帝；對此個信，伊得著上帝認定做義人，接納伊的祭物。雖然亞伯已經死，通過此個信，伊猶啲講話。
5 對信，以諾無經驗死，受遷徙去上帝遐。人無閣看著伊，因為上帝給伊遷徙去；以諾受遷徙以前已經互上帝認定接納。
6 無信就𣍐當互上帝歡喜，因為親近上帝的人一定著信上帝有存在，閣信伊會互尋求伊的人得著報賞。
7 對信，挪亞對猶未看著的事有聽上帝的警告，存敬畏的心，造一隻大船救伊全家。對此個信，伊定世間人的罪，閣根據此個信，伊成做義的繼承人。
8 對信，亞伯拉罕受召去啲欲承受做產業的地的時，雖然毋知欲去叨位，猶久伊有順趁出去。
9 對信，伊寄居佇應允的地，若親像𫢶佇外國，及做夥承受仝應允的以撒、雅各住佇布棚；
10 因為伊期待上帝所設計及起造彼個有地基的城。
11 對信，亞伯拉罕雖然已經老，莎拉嘛已經超過生產的年歲，伊猶會當作老父，因為確信應允伊的上帝是信實。
12 所以通講，對一個啲欲死的人有生湠子孫，親像天頂的星赫呢多，親像海邊的沙算𣍐了。
13 諸個攏是到死一直有信心的人；𪜶無得著上帝給𪜶應允的，毋拘對遠遠看見就歡喜，承認家己不過是地上的出外人，是寄居的。
14 講諸個話的人表示𪜶是啲尋一個家鄉。
15 𪜶若是啲懷念離開的所在，猶有機會通倒去。
16 不過，現在𪜶啲欣慕的是天頂彼個閣較好的所在。所以，上帝無因為𪜶稱伊做上帝來感覺見笑。伊甚至已經為著𪜶準備一個城。
17 對信，亞伯拉罕受考驗的時獻以撒做祭物，就是承受應允的亞伯拉罕歡喜獻伊的孤子。
18 上帝有對伊講：「對以撒生的才通算做你的子孫。」
19 亞伯拉罕想講上帝會當互以撒對死人中閣活，所以通譬喻講以撒是死閣倒轉來。
20 對信，以撒為著將來的事給雅各及以掃祝福。
21 對信，雅各臨終的時給約瑟的子一個一個祝福；伊靠佇柺仔頭敬拜上帝。
22 對信，約瑟臨終的時有提起以色列人出埃及的事，閣吩咐關係伊的骨骸埋葬的事。
23 對信，摩西出世以後，伊的父母看著嬰仔清秀，毋驚王的命令，將伊藏三月日久。
24 對信，摩西長大以後，拒絕人給伊稱做埃及公主的子，
25 較愛及上帝的子民同受苦難，無愛享受罪中一時仔久的快樂。
26 伊看為著基督受凌辱比埃及的財寶較寶貴，因為伊仰望將來的報賞。
27 對信，摩西毋驚王的受氣離開埃及；伊堅持到底，因為伊有看見人看𣍐著的上帝。
28 對信，摩西設立𨃟過節，吩咐著灑血佇門裡，才𣍐互剿滅者磕著以色列人的大子。
29 對信，以色列人過紅海親像啲行焦地；埃及人嘛想欲過，煞互水淹死。
30 對信，以色列人踅耶利哥城七日，城牆就倒落去。
31 對信，娼妓喇合親切接待偵探，所以無及許個毋順服上帝的人做夥滅亡。
32 我豈著閣講？我無夠時間通提起基甸、巴拉、參孫、耶弗他、大闢、撒母耳，及眾先知的事。
33 諸個人靠信心刣贏列國。𪜶推行正義，領受上帝的應允。𪜶封密獅的嘴，
34 拍化烈火，逃脫刀劍的殺害。𪜶軟弱變做堅強，佇戰場變做勇猛，拍贏外國的軍隊。
35 有一寡婦仁人有接𪜶的親人對死人中倒轉來。
嘛有一寡人為著欲閣活，得著較好的活命，拒絕解放，甘願受酷刑到死。
36 有一寡人受戲弄，鞭拍；嘛有一寡人受捆縛，關監。
37 𪜶互人用石頭抌死，用鋸仔鋸死，用刀刣死。𪜶穿綿羊抑是山羊的皮，逐所在奔波，忍受欠缺、迫害、虐待。
38 此世間無值得𪜶徛起；𪜶佇曠野、山嶺、石洞抑是地穴，四界流浪。
39 諸個人通過𪜶的信攏有得著上帝認定接納，毋拘無得著所應允的，
40 因為上帝為著咱有較好的安排；伊的旨意是愛諸個人及咱有份佇此個安排，按呢所信的才會當完全實現。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。