上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
希伯來書
10 既然律法毋是啲欲來好事本身的真像，是好事的影，所以𣍐當一年過一年繼續用像款的祭物互親近上帝的人得著完全。
2 若是會，獻祭的事應該已經停止啊，因為敬拜的人一遍就完全得著潔淨，無閣有罪的意識。
3 其實，逐年所獻的祭物只有會互人想起𪜶的罪；
4 因為牛、羊的血𣍐當除去人的罪。
5 所以，基督來到世間的時有講：
祭祀及禮物，你無愛；
毋拘你有給我準備身軀。
6 燒化祭及贖罪祭，你無合意。
7 彼時我講：
上帝啊，我來啦；
我來是欲實行你的旨意。
我的事有記載佇冊裡。
8 我頂面有講：「祭祀及禮物、燒化祭及贖罪祭你無愛，嘛無合意；諸個是照律法來獻的。」
9 伊續落去講：「看啊，我來是欲實行你的旨意。」按呢，上帝廢除前的，是欲建立後的。
10 耶穌基督實行上帝的旨意，只有一遍獻伊家己的身軀就夠額互咱得著聖化歸上帝。
11 祭司逐日徛啲服事上帝，一遍閣一遍獻像款的祭，永遠𣍐當除去人的罪。
12 毋拘基督只有一遍獻贖罪祭，然後坐佇上帝的正旁，
13 聽候上帝互伊的對敵做伊的腳砧。
14 基督通過一遍的獻祭，互聖化歸主的人永遠完全。
15 聖神嘛有對咱作證。伊有講：
16 主講：許個日子以後，
我及𪜶所欲立的約就是按呢：
我欲將我的律法囥佇𪜶的心內，
寫佇𪜶的腦內。
17 然後伊閣講：
我𣍐閣記得𪜶的罪惡及過犯。
18 既然罪已經得著赦免，就毋免閣獻贖罪祭。
咱來親近上帝
19 所以，兄弟姊妹，咱靠耶穌流血死會當有確信及勇氣進入至聖所。
20 伊通過帳簾，就是家己的身軀，給咱開一條新閣活的路。
21 咱已經有一位偉大的祭司啲治理上帝的家，
22 咱著用真誠的心，堅決的信，清氣無虧欠的良心及清水洗過的身軀來親近上帝。
23 咱著堅決持守所宣認的向望，因為應允咱的上帝可靠。
24 咱著互相關心通激勵相疼及做好事。
25 有一寡人停止聚會，毋通學𪜶的習慣，顛倒著互相勸勉；既然恁知主的日啲欲到，閣較著按呢。
26 咱認識真理以後猶故意犯罪，就無閣有通贖罪的祭物，
27 只有用驚惶的心聽候審判及啲欲燒滅敵對上帝的人的烈火。
28 違犯摩西的律法的，根據兩個抑是三個人作證就通給伊處死，攏無寬赦。
29 按呢，踐踏上帝的子，藐視互𪜶聖化歸主的約的血，閣侮慢施恩的聖神的人，恁想𪜶應該受的刑罰會加偌重？
30 咱知，講「申冤在佇我，我會報應」，閣講「主欲審判伊的子民」彼位是什麼人？
31 陷落永活上帝的手實在真通驚！
32 恁著會記得過去的日子。恁受上帝的光照以後，有忍受大爭鬥的苦難；
33 有時恁公然受侮辱，虐待；有時恁及別人同受虐待。
34 恁及囚犯同受苦；恁的財物受搶奪嘛甘願忍受，因為知恁家己有閣較好閣永遠存在的產業。
35 所以，毋通失落勇氣；此個勇氣會互恁大的報賞。
36 恁著有耐心才會當實行上帝的旨意，領受伊所應允的福分。
37 因為閣一時仔久，
彼位啲欲來的會到，𣍐延遲。
38 毋拘屬我的義人會對信來活。
若有人躊躇退後，我就無合意。
39 咱咧，咱毋是退後致到沉淪，是對信致到性命得著保全。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。