上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
希伯來書
9
地上及天頂的聖所
頭一個約嘛有禮拜的規定及地上的聖所。
2 有一個搭好勢的帳幕，頭前間叫做聖所，內面有燈台、桌，及獻祭的餅。
3 第二個帳簾的後面間叫做至聖所，
4 內面有金香壇及全部用金包的約櫃，櫃內有貯嗎哪的金壺、亞倫彼支茁芽的柺仔，及兩塊約的石版。
5 櫃頂有榮光的天使基路伯，𪜶的翼遮蓋施恩座。關係諸個事，現在我𣍐當詳細說明。
6 諸個物件照按呢安排好勢，祭司就逐日入去帳幕的頭前間舉行禮拜儀式。
7 後面間只有大祭司才通入去，毋拘逐年只有一遍，逐遍著帶血入去，為著本身以及民眾無意中犯的罪來獻。
8 對諸個安排聖神有明明表示，帳幕的頭前間猶存在，進入至聖所的路就猶未開。
9 帳幕的頭前間譬喻現世，是講，所獻的禮物及祭品𣍐當互禮拜的人的良心清白。
10 諸個干焦是關係飲食及逐款的潔淨禮，是屬外表的規例，只有適用到上帝更新萬物的時。
11 毋拘基督已經來，作大祭司，有實現好事。伊有經過較大、較完全，毋是人的手所搭，毋是屬此世間的帳幕。
12 伊只有一遍進入至聖所，毋是用山羊的血及牛仔的血，是用家己的血為著咱成全永遠的救贖。
13 山羊及牛的血，以及牛母仔的骨灰若灑佇無清氣的人都會互𪜶聖化清氣，
14 何況基督通過永遠的神獻伊無瑕疵的本身互上帝，伊的血豈𣍐互咱的良心閣較清氣，脫離死的行為，來服事永活的上帝？
15 因為按呢，基督做新的約的中間人，是欲互上帝呼召的人會得領受伊所應允永遠的產業，因為基督已經用伊的死贖回𪜶佇前的約的時所犯的罪過。
16 關係遺囑，一定著先證實立遺囑的人已經死。
17 因為遺囑一定著立遺囑的人死才有效。立遺囑的人猶活啲，遺囑就無效。
18 按呢，連頭一個約嘛是有用血來成立。
19 摩西照律法將一切的誡命對人民宣布，然後捧牛及山羊的血摻水，用朱紅色的羊毛及牛膝草灑佇彼本冊的頂面及全體人民的身上，
20 講：「這是上帝及恁立約的血。」
21 像款，摩西嘛將血灑佇帳幕及禮拜的時所用一切的器具。
22 照律法，差不多所有的物攏用血潔淨；無流血就無赦罪。
基督的犧牲互人的罪得著潔淨
23 照天頂的款式所仿造的物需要用牲生的血來潔淨；毋拘天頂的原物需要用比諸個較好的祭物來潔淨。
24 基督入去的並毋是人的手造的聖所，這不過是真聖所的副本；伊是入去天頂的真聖所。伊現在為著咱出現佇上帝的面前。
25 基督毋免一遍閣一遍獻本身，親像大祭司著逐年繼續帶牲生的血入去至聖所。
26 若著一遍閣一遍獻，對創造世界以來，基督著一遍閣一遍受苦。毋拘現在佇此個世代的路尾，伊只有出現一遍，將本身獻做祭來除去罪。
27 照所註定，人著一遍死，死後著受上帝審判。
28 親像按呢，基督已經有一遍犧牲來擔當眾人的罪；伊會第二遍顯現，毋是欲對付罪，是欲拯救迫切啲聽候伊來的人。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。