上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
希伯來書
6 1-2 所以，咱毋通停留佇基督初步的道理，著追求成熟；無閣再干焦佇脫離死的行為及信上帝、潔淨禮及按手禮、死人的閣活及永遠的審判等的教示啲拍基礎。
3 上帝若准，咱欲按呢做。
4-6 許個人曾互上帝的光照，曾啖著屬天的恩賜，曾分享聖神，曾體驗上帝的話的好處，嘛曾感受啲欲來的世代的權柄。按呢，𪜶猶久背信！此款人無法度互𪜶重新悔改行倒轉；因為𪜶閣將上帝的子釘佇十字架頂，公然給伊侮辱。
7 土地不時啲吸收對天落來的雨水，生產菜蔬，對作穡人有路用，這是對上帝領受的祝福。
8 毋拘土地若發草刺及雜草就無路用，連鞭會受咒詛，最後互火燒。
9 所疼的兄弟姊妹，雖然阮按呢講，猶久深信恁的情形比所講的較好，會當得著救。
10 上帝毋是無公道，伊一定會記得恁所做的工作，就是恁為著伊繼續啲服務信徒所表現的疼心。
11 阮真愛恁逐個人對頭到尾保持熱心，互恁所向望的會完全實現。
12 按呢恁才𣍐貧憚，才會學許個對信及吞忍來承受上帝應允的人。
上帝確實的應允
13 上帝應允亞伯拉罕的時，既然無比伊較大的通立誓，就指本身立誓，
14 講：「我一定欲賜福互你，欲加添子孫互你。」
15 亞伯拉罕𠢕吞忍，所以有得著所應允的。
16 因為人是指比伊較大的來立誓；嘛用立誓做擔保來解決𪜶中間所有的爭執。
17 上帝愛許個承接應允的人確實知，伊的計劃𣍐改變，所以用立誓來保證。
18 伊的應允及立誓此兩項攏𣍐改變，因為伊𣍐講白賊，互咱諸個逃避去求伊保護的人會當得著真大的激勵，通持守彼個佇咱頭前的向望。
19 咱有此個向望，親像性命的碇拋佇聖所帳簾的內面安全可靠。
20 耶穌為著咱做先鋒已經入去遐，照麥基洗德的班次作大祭司直到永遠。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。