上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
希伯來書
2
偉大的拯救
所以，咱一定著閣較致意所聽著的信息，才免偏離真道。
2 因為通過天使所傳的信息若有功效，背逆無順從的人著受應受的刑罰；
3 按呢咱忽略即呢大的拯救，欲哪會當閃避著受的刑罰？主本身有代先宣布此個拯救，聽見的人嘛有對咱證實此個事。
4 上帝閣有用神跡、奇事、逐款大權能的作為，及照伊家己的意思所分配聖神的恩賜做夥作證。
拯救的開拓者
5 上帝無將咱所講此個將來的世界交互天使管理。
6 毋拘聖經有一個所在作證講：
人算什麼，你赫呢關心？
世間人算什麼，你赫呢照顧？
7 你互伊比天使小可較低；
你賜榮光尊貴做花冠給伊戴，
8 互萬有攏降服佇伊腳下。
上帝既然互萬有攏降服伊，就無一項無降服伊。毋拘到現在咱猶未看見萬有攏降服伊。
9 咱看見彼位比天使小可較低的耶穌已經經過死的痛苦，得著榮光尊貴的花冠；按呢伊靠上帝的恩典通為著眾人死。
10 彼位創造閣維持萬有的上帝為著欲導真多子兒進入榮光，才著互拯救的開拓者耶穌經過苦難成做完全。
11 事實，互人成聖的及得著成聖的，攏對仝一個源頭出，因為按呢，耶穌稱呼𪜶做兄弟姊妹亦無感覺見笑。
12 伊對上帝講：
我欲對我的兄弟及姊妹報揚你的名，
佇𪜶的聚會中吟詩謳咾你。
13 伊閣講：
我欲信靠伊；
也講：
看咧，我及上帝賜互我的子兒攏佇遮。
14 既然諸個子兒是有血有肉的人，伊本身嘛及𪜶像款成做有血有肉的人，通通過伊的死毀滅彼個掌管死亡的魔鬼，
15 閣解放許個因為死亡的驚惶一生做奴才的人。
16 當然，伊啲關心的毋是天使，是亞伯拉罕的子孫。
17 所以，伊佇逐方面著及伊的兄弟姊妹仝款，通佇上帝的面前作仁慈忠信的大祭司，通互眾人的罪得著赦免。
18 因為伊家己有受苦，受考驗，伊會當幫贊許個受試探的人。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。