上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
腓利門書
1 我是保羅，作基督耶穌的囚犯；我及咱的兄弟提摩太寫批互阮所疼的同工腓利門、
2 阮的姊妹亞腓亞、阮的戰友亞基布，以及佇你的厝啲聚會的教會。
3 願咱的父上帝及主耶穌基督賜恁恩典及平安！
腓利門的疼心及信心
4 我逐遍祈禱的時攏有想著你，常常感謝我的上帝；
5 因為我有聽著你對上帝所有的子民有疼心，對主耶穌有信心。
6 我懇求上帝，通過阮及恁分享信仰，會當促進咱對及基督結連所得著一切的祝福，有較深的了解。
7 兄弟啊，你的疼心有互我真大的歡喜及鼓勵！上帝的子民攏有對你得著激勵。
為阿尼西謀祈求
8 我靠基督雖然會當好膽命令你做應該做的代誌，
9 毋拘，因為疼的緣故我寧可給你求。我保羅已經年老，現在猶是基督耶穌的囚犯。
10 我替阿尼西謀給你求，伊是我關監的時所生的。
11 伊以前對你攏無路用，現在對你對我攏真有路用。
12 現在我送伊轉去你遐；伊是我所疼惜的。
13 我原來想欲給伊留佇身邊，通佇我為著福音做囚犯的中間替你服事我；
14 毋拘無你的同意，我按呢做較好，互你所做的好事毋是勉強，是甘心樂意。
15 豈採因為按呢，阿尼西謀著暫時離開你，是欲互你永久給伊留啲；
16 無閣是奴隸，身份超過奴隸，是所疼的兄弟。對我來講特別是按呢，對你來講閣較是按呢；伊毋若是你家內的人，嘛是主內的兄弟。
17 所以，你若看我做同伴，就著親像接納我按呢給伊接納。
18 伊若有對你做什麼毋著，抑是有欠你什麼，算我的賬。
19 我保羅親手寫：我負責還。我應該毋免給你提醒，你欠我的是你本身。
20 是啦，兄弟，因為主的緣故，給我鬥相共一下，互我的心靠基督得著激勵。
21 我寫批互你，因為確信你會聽我的要求；其實，我知你會做比我講的閣較多。
22 嘛著給我準備一間房間，因為我向望上帝會聽恁的祈禱，互我會當去恁遐。
最後的請安
23 為著基督耶穌及我同作囚犯的以巴弗欲給恁請安。
24 我的同工馬可、亞里達古、底馬、路加嘛欲給恁請安。
25 願主耶穌基督的恩典及恁的心靈同在！
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。