上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
提多書
1 我是保羅，作上帝的僕人及耶穌基督的使徒，受選派幫贊上帝選民的信仰，互𪜶認識合佇敬虔的真理；
2 此個真理互咱對永遠的活命有向望，就是𣍐講白賊的上帝佇萬世以前應允欲互咱的。
3 伊佇時機成熟的時，通過信息的宣講將此個應允顯明出來。我有受託，奉咱的救主上帝的命令宣講此個福音。
4 提多，我寫批互你，佇咱共同的信仰你是我真的子。願父上帝及咱的救主基督耶穌賜你恩典及平安！
提多佇克里特的工作
5 我給你留佇克里特，是欲互你處理猶未辦清楚的代誌，閣照我所指示，佇逐個城市選派人做長老。
6 作長老的著無通指責，只有一個某，子兒攏是信徒，閣無人控告是放蕩抑是毋順服。
7 教會的監督，既然作上帝的管家，一定著無通指責，無自高，無歹性地，無酒醉，無兇暴，無貪財。
8 著𠢕款待出外人，𠢕做好事，守己，正直，聖潔，節制。
9 伊著堅守彼個可靠符合教義的信息，按呢才會當用健全的教示勸勉人，辯倒反對的人。
10 因為有真多毋順服的人，特別是許個主張著受割禮的人，𪜶愛講無路用的話，閣欺騙人。
11 此款人一定著禁止𪜶講話，因為𪜶為著欲貪不義的錢財，用無應該教示的話破壞一寡家庭。
12 𪜶克里特人有一個先知曾按呢講：「克里特人愛講白賊，是兇惡的野獸，貪食閣貧憚。」
13 伊講的是事實。所以你著嚴格給𪜶責備，通互𪜶有健全的信仰，
14 無聽趁猶太人無影跡的傳說及背逆真理的人的規例。
15 對清氣的人來講，一切攏清氣；毋拘對污穢及毋信的人來講，無一項是清氣，因為𪜶的心思及良知攏是污穢。
16 𪜶公開講識上帝，卻用行為否認伊。𪜶可惡，背逆，𣍐當做什麼好事。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。