上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
帖撒羅尼迦後書
3
為著阮祈禱
兄弟姊妹，阮猶有話欲給恁講。請恁為著阮祈禱，互主的信息會親像佇恁中間按呢真緊傳開閣得著榮光。
2 嘛請恁祈求上帝互阮會當脫離作惡作毒的人，因為毋是逐個人攏有信。
3 主是可靠的；伊會互恁堅固，會保守恁脫離彼個邪惡者。
4 主互阮對恁有信心，相信阮交代恁的代誌，恁現在有啲做，後來嘛會做。
5 願主引導恁，互恁學習上帝的疼及基督的吞忍！
盡作工的義務
6 兄弟姊妹，阮奉主耶穌基督的名命令恁，若有信徒生活散漫貧憚，無遵守阮傳授互𪜶的教示，恁著閃開。
7 恁家己嘛知恁應該著按怎學阮，因為阮佇恁中間的時無散漫貧憚。
8 阮毋曾白食別人的飯；反轉暝日拖磨勞苦，才免成做恁的負擔。
9 阮按呢做，毋是講阮無權通要求供應，是愛用阮家己做恁的模樣，互恁通學阮的款式。
10 阮佇恁遐的時曾命令恁講：「毋肯作工的人毋通食。」
11 阮按呢講，是因為阮有聽見恁中間有人貧憚毋做工，只有愛插人的閒仔事。
12 此款人，阮奉主耶穌基督的名給𪜶警告，命令𪜶著安份做工，家己討賺。
13 毋拘，兄弟姊妹，做好事毋通想倦。
14 若有人毋肯服從阮佇此張批所吩咐的話，著給伊記啲，毋通及伊來往，互伊感覺見笑；
15 不過毋通給伊看做對敵，著看伊做兄弟抑是姊妹給伊勸勉。
祝福
16 願賜平安的主不時用逐款方法親身賜恁平安！願主及恁大家同在！
17 我保羅親筆給恁請安。我佇逐張批攏有按呢簽名。我攏按呢寫。
18 願咱的主耶穌基督的恩典及恁大家同在！
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。