上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
利未記
9
亞倫獻祭
到第八日，就是授職禮了後的隔日，摩西召亞倫及伊的子，以及以色列的長老來。
2 摩西對亞倫講：「你著牽一隻牛仔做贖罪祭，一隻綿羊做燒化祭，攏著無瑕疵的，獻互上主。
3 你嘛著吩咐以色列人，著取一隻無瑕疵的山羊做贖罪祭，閣取無瑕疵一歲的牛仔子及綿羊仔各一隻做燒化祭。
4 閣著取一隻牛及一隻綿羊做平安祭，及抄油的素祭做夥獻互上主。今仔日上主欲對恁顯現。」
5 按呢，𪜶照摩西的命令將諸個帶來會幕頭前；全體會眾攏倚來徛佇上主的面前。
6 摩西講：「這是上主的命令，恁照按呢做，伊的榮光就欲對恁顯現。」
7 摩西對亞倫講：「你著來祭壇前，照上主的命令獻你的贖罪祭及燒化祭，為你家己及人民贖罪，閣獻人民的祭物為𪜶贖罪。」
8 亞倫就來到壇前，刣彼隻為伊家己做贖罪祭的牛仔。
9 亞倫許個子捧血互伊，伊就用指頭仔搵血，抹佇祭壇頂面四支翹起來的角；將賰的血倒佇祭壇腳。
10 伊閣照上主命令摩西的，將贖罪祭的油、腰子，及肝的網紗，下佇壇頂燒；
11 閣將肉及皮提去營外燒。
12 亞倫閣刣燒化祭的牲生；伊許個子捧血互伊，伊就將血灑佇祭壇的四周圍。
13 𪜶閣將燒化祭牲生的頭及一塊一塊的肉提互亞倫；伊就給諸個下佇壇頂燒。
14 伊閣洗腹內及大腿，下佇祭壇頂燒化祭的頂面燒。
15 亞倫閣為著人民獻祭。伊牽彼隻為人民做贖罪祭的山羊來，給刣，然後獻做祭物；作法及獻頭前彼隻像款。
16 伊嘛照規例獻燒化祭。
17 早起時的燒化祭以外，亞倫閣獻素祭，對彼中間搣一把麵粉下佇壇頂燒。
18 伊閣刣牛及綿羊，為人民獻做平安祭；亞倫許個子捧血互伊，伊就將血灑佇祭壇的四周圍。
19 𪜶閣提牛及綿羊的油、肥的尾、腹內的油、腰子，及肝的網紗互伊。
20 𪜶將諸個油下佇胸坎肉頂面，亞倫就佇壇頂給油燒掉。
21 亞倫將諸個胸坎肉及正旁的大腿，搖搖咧做祭物獻互上主；攏照摩西的命令做。
22 亞倫獻贖罪祭、燒化祭、平安祭了後，向人民攑雙手，給𪜶祝福。伊就對祭壇落來。
23 摩西及亞倫入去會幕內，閣出來給人民祝福；上主的榮光對人民顯現。
24 有火對上主的面前出來，燒壇頂的燒化祭及油；全體人民看見，就歡呼，仆佇土腳敬拜。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。