上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
歌羅西書
3 既然恁已經及基督做夥閣活，就著追求天頂的事，佇遐基督坐佇上帝的正旁。
2 恁著專心致意頂面的事，毋是地上的事。
3 因為恁已經死，恁的活命及基督做夥隱藏佇上帝內面。
4 基督是恁的活命；伊顯現的時，恁嘛會及伊做夥顯現來分享伊的榮耀。
舊的人及新的人
5 所以，著消滅恁許個屬世的慾望，就是淫亂、污穢、邪情、邪慾，及貪戀 — 貪戀是拜偶像。
6 因為諸個事，上帝的受氣欲臨到背逆的人。
7 恁以前趁諸個慾望啲生活的時，言行舉止嘛受𪜶支配。
8 毋拘現在恁著棄拺受氣、歹性地、怨恨、誹謗，及講垃屑話等。
9 毋通互相欺騙，因為恁已經有將舊的人及習慣褪起來，
10 將新的人穿落去；此個新的人，創造主照家己的形像繼續啲給伊更新，互恁通真正識伊。
11 按呢，無閣分別希臘人抑是猶太人，受割禮抑是無受割禮，未開化，野蠻，奴隸抑是自由人。毋拘基督是一切，也佇一切的內面。
12 恁是上帝所揀選的子民，是伊所疼的，所以著用憐憫、慈愛、謙卑、溫柔，及耐心做衫穿落去。
13 恁中間若有糾紛，著互相寬容，彼此赦免；親像主有赦免恁，恁嘛著按呢相赦免。
14 諸個以外，著閣加疊疼心，因為疼會互一切連結，完全和合。
15 著互基督所賜的和平支配恁的心；為著欲互恁有此個和平，恁受揀召成做一體。恁閣著時常感謝。
16 著互基督的話豐豐富富𫢶佇恁內面。著用逐款的智慧互相教示，彼此勸戒，唱詩篇、聖詩、靈歌，對心底感謝謳咾上帝。
17 恁無論做什麼，講話抑是做代誌，攏著奉主耶穌的名來做，通過伊來感謝父上帝。
新的人際關係
18 作婦仁人的，著順服丈夫，因為這是信主的人的本分。
19 作丈夫的，著疼婦仁人，毋通給𪜶歹款待。
20 作兒女的，逐項代誌著順服父母，因為這是主所歡喜的。
21 作老父的，毋通激兒女受氣，才𣍐互𪜶灰心失志。
22 作奴隸的，逐項代誌著順服世上的主人，毋是為著欲互𪜶歡喜才佇𪜶面前按呢做，是因為敬畏主誠心做。
23 恁無論做什麼，著盡心做，毋是為著人，是為著主做。
24 著知，主會給恁報賞，互恁對伊得著產業；恁啲服事的是主基督。
25 作歹的人會受歹的報應，因為上帝𣍐偏待人。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。