上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
利未記
8
設立祭司
( 出 29:1-37 )
上主吩咐摩西，講：
2 「你著導亞倫及伊的子來我遮，嘛帶禮服、通抹的聖油、贖罪祭的牛一隻，及綿羊兩隻、無酵餅一籃來。
3 閣召集全體會眾來會幕門口。」
4 摩西照上主的命令做，會眾就聚集佇會幕門口。
5 摩西給會眾講：「下面是上主命令咱著做的事。」
6 摩西導亞倫及伊的子來，用水給𪜶洗。
7 摩西給亞倫穿內袍，縖腰帶，穿外袍，疊以弗得，將用奇巧的手路織的以弗得的帶給伊縖，給以弗得縛佇伊的身軀；
8 閣給伊疊胸袋，將烏陵及土明下佇胸袋內面，
9 給伊戴禮帽，佇禮帽的頂面安金牌，互禮帽成做聖帽。摩西攏照上主的命令按呢做。
10 摩西用通抹的聖油抹會幕及內面所有的器具，給𪜶分別作聖；
11 閣用彼個油灑祭壇的頂面七遍，抹祭壇及伊所有的器具、洗盪的盆及盆座，給𪜶分別作聖；
12 閣用聖油倒佇亞倫的頭殼頂，給伊按立，分別作聖。
13 摩西導亞倫的子來，給𪜶穿內袍，縖腰帶，包頭巾。摩西攏照上主的命令按呢做。
14 摩西牽贖罪祭的牛仔來；亞倫及伊的子按手佇彼隻牛仔的頭殼。
15 摩西就刣彼隻牛，然後用指頭仔搵血，抹佇祭壇頂面四支翹起來的角，互壇清氣；將賰的血倒佇祭壇腳，分別作聖，給伊潔淨。
16 摩西閣將牛仔腹內所有的油、肝的網紗、兩粒腰子，以及腰子頂面的油，攏下佇壇頂燒。
17 牛仔的皮、肉，及糞，伊攏帶出去營外燒。摩西攏照上主的命令按呢做。
18 摩西牽燒化祭的綿羊來；亞倫及伊的子按手佇彼隻綿羊的頭殼。
19 摩西就刣彼隻羊，將羊的血灑佇祭壇四周圍，
20 給羊切一塊一塊；將頭，及歸塊歸塊的肉，以及油攏提去燒。
21 伊閣給腹內及腿用水洗清氣，將歸隻羊下佇祭壇頂燒；這是燒化祭，是用火燒獻互上主芳芳的祭物。摩西攏照上主的命令做。
22 摩西閣牽第二隻綿羊來，做祭司授職禮的路用；亞倫及伊的子按手佇羊的頭殼。
23 摩西就刣彼隻羊，提一寡血抹佇亞倫正旁的耳珠，閣抹佇伊正手及正腳的大頭姆。
24 伊閣導亞倫的子來，用一寡血抹佇𪜶正旁的耳珠、正手及正腳的大頭姆；然後將賰的血灑佇祭壇的四周圍。
25 伊閣取油、肥的尾、腹內的油、肝的網紗、兩粒腰子及腰子的油，以及正腿。
26 閣對彼跤下佇上主面前貯無酵餅的籃仔，提一塊無酵餅、一塊攪油的餅，及一塊薄餅，下佇油及正旁大腿的頂面。
27 摩西將諸個下佇亞倫及伊許個子的手，互𪜶佇上主的面前搖搖咧做祭物。
28 摩西對𪜶的手接過來，下佇壇頂燒化祭的頂面燒。這是佇授職禮，用火燒獻互上主芳芳的祭物。
29 摩西提羊的胸坎肉，佇上主的面前搖搖咧做祭物；這是授職禮的羊的中間，摩西應得的份額。摩西攏照上主的命令做。
30 摩西提通抹的聖油及一寡壇頂的血，灑佇亞倫及伊的子，以及𪜶的衫，給𪜶及𪜶的衫分別作聖。
31 摩西對亞倫及伊的子講：「恁著照上主的命令，佇會幕的入口煮諸個肉，及祭司授職禮籃仔內的餅佇遐做夥食。
32 食賰的肉及餅，恁著燒掉。
33 恁七日久攏毋通離開會幕，直到恁授職禮的日期滿，因為授職禮需要七日。
34 恁今仔日所做的，是照上主的命令，為著欲給恁贖罪。
35 七日久恁著留佇會幕入口，暝日攏佇遐；遵守上主的命令，恁才免死。上主按呢命令我。」
36 亞倫及伊的子就遵行上主通過摩西互𪜶的命令。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。