上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
歌羅西書
1
請安
我是保羅，奉上帝的旨意作基督耶穌的使徒；我及咱的兄弟提摩太
2 寫批互住佇歌羅西的信徒，就是及基督結連忠信的兄弟姊妹。
願咱的父上帝賜恁恩典及平安！
感謝的祈禱
3 阮為著恁祈禱的時不時啲感謝咱的主耶穌基督的父上帝，
4 因為有聽著恁對基督耶穌有信心，對所有的信徒有疼心。
5 諸個攏是用彼個為著恁囥佇天頂的向望做根據；此個向望當初福音真道傳互恁的時，恁已經有聽著。
6 此個福音毋若傳到恁遐，嘛傳到全世界，繼續成長結果子，抵及恁以前聽見閣真正認識上帝的恩典彼時的情形仝款。
7 恁有對親愛的以巴弗學習此個福音；伊及阮平平作僕人，為著恁做基督忠實的差用，
8 嘛有對阮講起聖神互恁有疼心的事。
9 因為按呢，對聽著恁的消息以後，阮有繼續啲為著恁祈禱，求上帝互恁會當對聖神得著逐款的智慧及理解，充分明白伊的旨意，
10 言行舉止照主所愛，凡事互伊歡喜，閣互恁做逐項好事，結好果子，對上帝的認識嘛愈加添。
11-12 願恁對伊榮耀的權能得著夠額的氣力，有耐心通忍受一切，閣用歡喜的心感謝天父，因為伊互恁會堪得分享伊為著家己的信徒保留佇光明國度的福氣。
13 伊救咱脫離烏暗的權勢，給咱徙入去伊所疼的子的國度；
14 咱對伊的子得著救贖，罪得著赦免。
基督及伊的工作
15 基督是看𣍐著的上帝的形像：
伊是大子，比一切受造的較早有。
16 因為上帝通過伊來創造萬有，
就是佇天頂及地上，
看會著的及看𣍐著的，
靈界坐王位的及主政者，
統領者及掌權者。
上帝通過伊，也為著伊，創造萬有。
17 猶未有萬有以前伊就存在，
萬有靠伊連結好勢。
18 伊是教會，就是伊的身軀的頭。
伊是元始，是大子；
上帝互伊成做頭一個對死人中閣活的，
通佇萬有中成做第一。
19 因為上帝照家己的旨意，
將家己完整的特性充滿佇伊內面。
20 通過伊的子，上帝互萬有，
無論佇天頂抑是地上，攏及伊和好；
上帝通過伊的子佇十字架頂
流血死來促成和平。
21 恁咧，恁有一時及上帝斷絕關係，心思及伊敵對，做歹代誌。
22 毋拘現在，上帝已經通過家己的子肉體的死，互恁及伊和好，成做聖潔，無缺點，無通嫌的祭物獻佇伊面前。
23 恁著堅持信仰，堅固徛在，互恁聽著福音的時所得著的向望無動搖。此個福音已經傳互天下所有的被造物；我 — 保羅就是此個福音的差用。
保羅作教會的差用
24 今我為著恁受苦感覺真歡喜；因為我肉體的受苦是啲完成基督為著伊的身軀，就是教會，受猶未了的苦難。
25 我作教會的差用；我對上帝領受的任務是為著恁，欲將伊的信息完全傳開。
26 此個信息是歷代以來對人類所隱密的奧祕，現在已經對伊的信徒顯明。
27 上帝欲互𪜶知影，伊為著外邦人所準備的奧祕是偌呢豐富閣榮耀。此個奧祕是基督佇恁內面，伊是恁分享上帝榮耀的向望。
28 所以，阮對所有的人宣揚基督，用逐款的智慧來勸戒閣教示眾人，通互所有佇基督內面成做成熟的人獻互上帝。
29 為著此個目的，我靠基督佇我內面運作的大能力盡力啲拍拼。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。