上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
腓立比書
1 我保羅及提摩太是基督耶穌的僕人。阮寫批互住佇腓立比，及屬基督耶穌攏總的信徒以及各位監督及執事。
2 願咱的父上帝及主耶穌基督賜恁恩典及平安！
為腓立比的信徒祈禱
3 我逐遍想著恁的時攏感謝我的上帝；
4 逐遍為著恁眾人祈禱的時攏用歡喜的心祈求，
5 因為恁對頭一日起到現在，攏有同心協力啲傳福音。
6 我深信彼位佇恁中間開始做美好工作的上帝，會繼續給彼個工作完成，直到基督耶穌閣來的日。
7 我常常啲數念恁，對恁眾人有此款的心情是當然的，因為無論我現在佇監獄內抑是以前為著福音辯護及作證的時，恁攏有及我分享上帝的恩賜。
8 我用基督耶穌的疼心偌呢數念恁大家，上帝通給我作證。
9 我所祈求的是按呢：恁的疼會愈加添，恁的智識及對逐項的判斷力嘛愈進步，
10 互恁會曉分別什麼才是上好，按呢佇基督的日恁才會成做純潔無通嫌的人，
11 充滿靠耶穌基督才有的好德行，通將榮光及謳咾歸互上帝。
活是基督
12 兄弟姊妹，我愛恁知，我所抵著的代誌顛倒互福音閣較進展，
13 致到王宮的全體警衛以及其他所有的人攏知影我關監是為著基督的緣故。
14 真多兄弟姊妹嘛因為我關監佇主內面閣較確信，閣較好膽無驚惶來傳上帝的信息。
15 有人傳基督是出佇怨妒及好爭論；嘛有人是出佇好意思。
16 諸個人是出佇疼心，知影我受任命是欲為福音辯護。
17 另外許個人宣揚基督是出佇野心，動機無純，想欲趁我關監的時加添我的艱苦。
18 按呢有什麼關係？是假意抑是真心，無論按怎，基督受傳開，我就為著按呢歡喜！
著，我欲繼續歡喜，
19 因為我知，對恁的祈禱及耶穌基督的神的幫贊，我一定會得著自由。
20 我迫切期待及向望的，就是無一項代誌會互我見笑；我時時刻刻，特別是現在，有夠額的勇氣，是活抑是死，通互基督通過我此個人得著榮耀。
21 因為，對我來講，活是基督，死是利益。
22 若是繼續活啲會當做較多有效果的工作，我煞毋知欲揀什麼。
23 我進退兩難。我實在真愛離開此個世間及基督做夥，這應該加好足多。
24 不過，為著恁的緣故，我閣較著活落去。
25 對此項，我確信；我知我欲活落去，欲繼續及恁大家活落去，是欲互恁的信仰閣較進步，閣較有歡喜，
26 按呢我及恁閣相見的時，恁會因為基督耶穌有充分的理由通用我做誇口。
27 無論按怎，恁的言行舉止著符合基督的福音。按呢，無論我會當閣去及恁相見抑𣍐，攏會當聽著恁的代誌，知恁攏用像一個心志徛在，同心做夥為著所信的福音拍拼。
28 無論做什麼，毋免驚反對者的威脅，按呢通證明𪜶會失敗，恁會得勝；此個得勝是對上帝來的。
29 因為上帝毋若有賜恁特別的恩惠來信基督，嘛互恁為著基督受苦，
30 來參與像款的爭戰；此個爭戰恁有看著我按怎戰，現在閣聽見我猶啲戰。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。