上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
加拉太書
1 我是保羅。我作使徒毋是對人抑是通過人，是通過耶穌基督及互伊對死人中閣活的父上帝的呼召。
2 我及佇遮的兄弟姊妹寫批互加拉太的眾教會。
3 願咱的父上帝及主耶穌基督賜恁恩典及平安！
4 為著欲救咱脫離現今此個邪惡的世代，基督有照咱的父上帝的旨意為著咱的罪獻伊本身。
5 願榮光歸互上帝直到永永遠遠。阿們！
唯一的福音
6 恁互我真著驚！恁竟然赫呢緊就放拺彼位通過基督的恩典呼召恁的上帝，去隨別個福音。
7 其實無別款的福音。我按呢講是因為有一寡人給恁擾亂，想欲曲解基督的福音。
8 毋拘，無論是阮抑是對天頂來的天使，所傳的若及阮以前傳互恁的福音無仝款，伊應該受咒詛！
9 阮曾講，現在閣講一遍：若有人所傳的福音及恁已經接受的無仝款，伊應該受咒詛！
10 我此陣按呢講，豈是欲得著人抑是上帝的稱讚？我豈是欲得著人的歡喜？我若猶啲想欲得著人的歡喜，我就毋是基督的僕人。
保羅按怎成做使徒
11 兄弟姊妹，我愛恁知，我所傳的福音毋是人想出來的。
12 此個福音，我毋是對人領受，嘛毋是對人學習，是對耶穌基督來的啟示。
13 恁已經有聽見我以前作猶太教徒的時的所行所做。我偌仔呢極力迫害上帝的教會，欲徹底給伊毀滅。
14 我比仝一輩的猶太人閣較積極遵趁猶太教規，閣較熱心遵守祖先的傳統。
15 毋拘，對上帝的恩典，我猶未出世，伊就決定給我分別出來，閣選召我，
16 對我啟示伊的子，互我通對外邦人宣揚伊的子的福音，我攏無給人請教，
17 嘛無上耶路撒冷去見許個比我較代先作使徒的人。我隨時去阿拉伯，然後閣倒去大馬士革。
18 三年後，我才去耶路撒冷拜訪彼得，及伊住十五日。
19 主的兄弟雅各以外，其他的使徒我攏無見著。
20 我所寫的攏是事實；佇上帝面前我無講白賊。
21 後來，我去敘利亞及基利家境內逐所在。
22 當時，猶太地區眾教會的信徒攏毋識我。
23 𪜶只有聽著別人講：「彼個以前迫害咱的人，現在啲傳伊過去想欲毀滅的信仰！」
24 𪜶就因為我歸榮光互上帝！
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。