上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
出埃及記
36 比撒列及亞何利亞伯，以及所有得著上主賞賜𪜶智慧聰明，互𪜶知按怎起造聖所逐款工程的師傅，攏照上主命令𪜶的去做。
人民奉獻禮物
2 摩西召集比撒列、亞何利亞伯，及所有受感動，得著上主賞賜𪜶智慧，歡喜來做工的師傅。
3 𪜶對摩西提以色列人為著起造聖所所獻的禮物。人民逐早起繼續將甘心奉獻的禮物帶來互摩西。
4 所以許個𠢕起造聖所的師傅，攏暫停𪜶原來的工課，
5 來對摩西講：「人民奉獻的禮物非常多，超過上主命令欲起造的工程所著用的。」
6 對按呢，摩西下令，𪜶就佇全營宣布，講：「無論男女，攏毋通閣為著聖所的工程奉獻禮物。」按呢人民才無閣奉獻。
7 𪜶奉獻的材料，已經有夠做所有的工程，閣有賰。
起造會幕
8 ( 出 26:1-37 )
𪜶中間所有𠢕的師傅，用十幅的布做會幕；諸個布是用挲過的幼麻，及藍色、紫色、朱紅色的紗織的，頂面閣用真幼的手路繡基路伯。
9 每幅布長十二公尺，闊兩公尺；逐幅的寸尺攏像款。
10 𪜶將五幅布接做一組；另外五幅嘛按呢。
11 閣佇逐組相接的布，路尾彼幅的邊仔做藍色的鈕環。
12 𪜶佇此組布做五十個鈕環；佇第二組布路尾彼幅的邊仔，嘛做五十個鈕環；兩組的鈕環攏兩個兩個相對。
13 𪜶閣做五十個金鉤仔，用鉤仔將兩組布連做夥，成做一個會幕。
14 𪜶用山羊毛織十一幅帳，做蓋會幕的布篷；
15 每幅帳長十三公尺，闊兩公尺；十一幅的寸尺攏像款。
16 𪜶將五幅帳連做一組，另外六幅嘛連做一組。
17 佇逐組相接的帳，路尾彼幅的邊仔做五十個鈕環。
18 𪜶閣做五十個銅的鉤仔，互布篷連做一個。
19 𪜶用染做紅色的羊的皮蓋布篷，閣用上好的皮蓋佇上頂面。
20 𪜶用金合歡木做會幕的壁枋。
21 壁枋長四公尺，闊六十六公分。
22 逐塊枋有兩個榫通相接；會幕所有的枋攏照按呢做。
23 南旁的壁枋做二十塊。
24 此二十塊枋的下面，做四十個銀的座；逐塊枋的下面有兩個孔通鬥𪜶的榫。
25 會幕的第二面，就是北旁，嘛做二十塊壁枋，
26 及四十個銀的座；逐塊枋的下面有兩個孔。
27 會幕的後面，就是西旁，做六塊枋。
28 會幕後面的角頭，做兩塊枋，
29 下面搋開，頂面相連直到頂面第一個環；兩旁攏是按呢，欲做角頭的路用。
30 有八塊枋，及十六個銀的座；逐塊枋的下面有兩個榫孔。
31-32 𪜶用金合歡木做橫楗；南旁及北旁各五支，會幕的後面，就是西旁，嘛五支。
33 壁枋對中彼支橫楗，對此頭迵到彼頭。
34 壁枋用金包啲，閣做金環通套橫楗；橫楗嘛用金包。
35 𪜶閣用藍色、紫色、朱紅色的紗，及挲過的幼麻織帳簾；此個帳簾用真幼的手路繡基路伯。
36 𪜶用金合歡木做四支柱，用金包啲，閣有金鉤仔；柱鬥佇四個有榫孔的銀的座頂面。
37 𪜶閣用藍色、紫色、朱紅色的紗，及挲過的幼麻，用刺繡的手路做會幕的門簾。
38 𪜶做五支柱，柱有鉤仔吊門簾；柱斗及橫杆用金包啲；彼五個有榫孔的座是銅的。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。