上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
出埃及記
35
安歇日的條例
摩西召集以色列全會眾，對𪜶講：「下面是上主命令恁著遵行的事。
2 六日著做工，第七日是聖日，是獻互上主的安歇日，著完全歇睏；若有人佇此日做工，著互伊死。
3 安歇日，恁逐口灶毋通起火。」
為會幕奉獻
4 ( 出 25:1-9 )
摩西對以色列全會眾講：「這是上主的命令：
5 著奉獻禮物互上主；所有甘心奉獻的人，攏通帶禮物來獻互上主，就是金、銀、銅、
6 藍色紫色朱紅色的紗、幼麻、山羊毛、
7 染做紅色的羊的皮、上等的皮、金合歡木、
8 點燈的油、製造通抹的聖油及芳香的芳料、
9 紅瑪瑙，以及欲鑲佇以弗得及胸袋的寶石。」
會幕的器具
10 ( 出 39:32-43 )
「恁中間𠢕的師傅攏著來做上主所吩咐的物件，就是
11 會幕，包括伊的布篷及頂面的蓋，以及鉤仔、板、橫楗、柱、有榫孔的座、
12 約櫃及伊的槓、約櫃的蓋及遮伊的帳簾、
13 排獻祭的餅的桌及伊的槓、桌頂的器具及獻祭的餅、
14 燈台及伊的器具、燈盞及燈油、
15 香壇及伊的槓、通抹的聖油及芳的香料、會幕的門簾、
16 燒化祭的祭壇及伊銅的網仔、祭壇的槓及壇所有的器具、洗盪的盆及盆座、
17 埕的帳帷及伊的柱、有榫孔的座及埕的門簾、
18 會幕及埕的杙仔及索仔，
19 以及幼工做的禮服，就是祭司亞倫佇聖所穿來服事的聖的禮服，及伊的子做祭司啲穿的禮服。」
人民的奉獻
20 以色列全會眾對摩西的面前出去。
21 所有受感動，心歡喜的人，攏帶禮物來獻互上主；諸個禮物通用來做會幕逐種的器具及聖的禮服。
22 所有甘心奉獻的查甫人及婦仁人攏將金器，就是胸前的鉼針、耳鉤、做印仔的手指、手環提來，搖搖咧做禮物獻互上主。
23 𪜶若有藍色紫色朱紅色的紗、幼麻、山羊毛、染做紅色的羊的皮，及上好的皮，嘛攏提來。
24 所有會當奉獻銀及銅的人，攏帶來做禮物獻互上主；所有有金合歡木通做逐款路用的，嘛攏帶來。
25 手藝真𠢕的婦女，將親手紡的藍色紫色朱紅色的紗及幼麻，攏提來。
26 手藝真好，心受感動的婦女，就紡山羊毛。
27 許個領袖嘛將會當鑲佇以弗得及胸袋的紅瑪瑙，及逐種寶石提來。
28 𪜶閣將油及芳料帶來做燈油及通抹的聖油，以及芳香。
29 為著上主吩咐摩西所著做的工，所有受感動心歡喜的以色列人，無論男女，攏將禮物帶來獻互上主。
起造會幕的師傅
30 ( 出 31:1-11 )
摩西對以色列人講：「上主已經對猶大支族揀選戶珥的孫，烏利的子比撒列；
31 閣用上帝的神給伊充滿，互伊有智慧、聰明及智識，𠢕做逐款的工藝；
32 𠢕設計圖案，用金、銀、銅做物件；
33 閣𠢕刻欲鑲的寶石，𠢕用木材刻逐款工藝品。
34 上主閣互伊及但支族，亞希撒抹的子亞何利亞伯，得著才能，通傳授才藝。
35 諸個人上主將智慧充滿𪜶，互𪜶會做逐款的工藝，無論是雕刻、圖案設計，用藍色紫色朱紅色的紗及幼麻刺繡，編織；𪜶真𠢕做工藝，嘛真𠢕設計圖案。」
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。