上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
出埃及記
30
燒香的壇
( 出 37:25-28 )
「你著用金合歡木做一座燒香的壇，
2 是四方的，長及闊攏四十五公分，高九十公分。壇彼四支翹起來的角著及壇連接做一塊。
3 壇的頂面、四圍，以及許個角，攏著用純金包啲；嘛著佇壇的四圍鑲金線。
4 你著佇金線的下面、壇的雙旁、兩支橫杆的頂面，做兩個金環，通穿槓扛壇。
5 著用金合歡木做槓，用金包啲。
6 你著將香壇囥佇約櫃前的帳簾頭前，及約櫃頂面的蓋相對，遐是我及你相會的所在。
7 亞倫逐早起整理燈火的時，著佇壇頂燒芳芳的香。
8 到黃昏亞倫點燈的時，嘛著燒香。恁著世世代代佇上主的面前不斷按呢燒香。
9 毋通佇此個壇燒別款的香，嘛毋通佇遮獻燒化祭、素祭，及奠酒祭。
10 亞倫著一年一遍，用贖罪祭的血抹壇頂的四支角，給香壇行潔淨禮。恁世世代代著按呢做。此個壇佇上主的面前是至聖的。」
性命的贖金
11 上主閣對摩西講：
12 「你調查以色列人人口的時，𪜶逐個人著為家己的性命獻贖金互上主，才免佇普查的時災禍臨到𪜶。
13 所有點算過的人，逐個著照聖所的公秤提六公克的銀獻互上主。
14 所有點算過二十歲以上的人，著將此六公克的銀獻互上主。
15 好額人毋免出較多，散赤人毋通出較少；逐個人攏著獻六公克的銀互上主，做性命的贖金。
16 你著對以色列人收此個贖金，做會幕的路用，互以色列人佇上主的面前得著記念，這是恁性命的贖金。」
銅盆
17 上主對摩西講：
18 「你著用銅做洗盪的盆及盆座，下佇會幕及祭壇的中間，內面貯水。
19 亞倫及伊的子欲佇遐洗手，洗腳。
20 𪜶入會幕，抑是倚壇前服事，獻用火燒的祭物互上主的時，著用水洗，才免死。
21 𪜶著按呢洗手洗腳，才免死；這欲做亞倫及伊的後代世世代代永遠的規例。」
通抹的聖油
22 上主閣對摩西講：
23 「你著取上等的香料，就是流質的沒藥六公斤、芳的肉桂三公斤、芳的菖蒲三公斤、
24 桂皮六公斤，攏照聖所的公秤，以及橄欖油四公升，
25 照做香料的方法調和，做通抹的聖油。
26 著用此個油抹會幕及約櫃、
27 桌及桌頂所有的器具、燈台及燈台的器具、香壇、
28 燒化祭的祭壇及壇所有的器具，以及洗盪的盆及盆座。
29 你著給𪜶分別作聖，互𪜶成做至聖；所有摸著諸個物件的攏成做聖。
30 你著給亞倫及伊許個子抹油，互𪜶分別作聖做祭司服事我。
31 你著給以色列人講：『此個油欲佇恁世世代代做我的聖油。
32 毋通倒佇一般人的身軀，嘛毋通用此個調和的方法做親像此款的油。此個油是聖的，恁嘛著給伊當做聖。
33 所有製造及聖油仝款的油，抑是用來抹祭司以外的人的，著對人民的中間給𪜶革出。』」
香的作法
34 上主對摩西講：「你著提蘇合香、香螺、白松香諸個香料，及純的乳香，逐項平重，
35 用製造芳料的方法做香，閣用鹽調和，互伊清氣聖化。
36 你著提一屑仔此個香，研做粉，下佇會幕內約櫃前；我欲佇遐及你相會；恁著看這做至聖。
37 恁毋通照此個方法為著家己做香；著看伊做聖，歸互上主。
38 若有人製造仝款的香欲鼻芳，著對人民的中間給伊革出。」
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。