上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
馬太福音
21
耶穌光榮進入耶路撒冷
( 可 11:1-11 路 19:28-40 約 12:12-19 )
耶穌及門徒啲欲到耶路撒冷，來到橄欖山附近的伯法其。彼時伊差兩個門徒，
2 給𪜶講：「恁去對面的庄社，到遐隨時會看著一隻驢縛啲，閣有一隻驢仔子及伊佇遐；恁給𪜶解開，牽來我遮。
3 若有人對恁講什麼，恁就講：『主欲用𪜶。』彼個人會隨時准恁牽來。」
4 此個代誌發生是欲應驗上帝通過先知所講的話：
5 著給錫安的婦仁人講：
看咧，恁的王欲來恁遮；
伊謙遜騎驢仔，
騎驢仔子。
6 門徒就去，照耶穌的指示去做。
7 𪜶牽驢仔及驢仔子來，將外衫袚佇𪜶頂面，耶穌就𬦰起去騎。
8 大部分的群眾將𪜶家己的外衫鋪佇路裡，嘛有人剉樹椏鋪佇路裡給伊歡迎。
9 前行後隨的群眾喝講：
大闢的子，和散那！
奉主的名來彼位應該受稱讚！
至高的上帝，和散那！
10 耶穌一下進入耶路撒冷，全城攏喊起來，講：「此個是啥人？」
11 眾人講：「此個是對加利利的拿撒勒來的先知耶穌。」
耶穌潔淨聖殿
12 ( 可 11:15-19 路 19:45-48 約 2:13-22 )
耶穌入去聖殿，將殿內所有啲買賣的人攏趕出去，閣捙倒換錢的人的桌及賣粉鳥的人的椅。
13 伊對𪜶講：「聖經有記載：
我的厝欲叫做祈禱的殿，
恁煞給伊變做土匪仔窟。」
14 有盲人及腳跛的人來聖殿尋耶穌，伊就給𪜶醫好。
15 祭司長及經學教師看著耶穌所行的奇事，閣聽見細漢囝仔佇聖殿大聲喝「大闢的子，和散那」，就真受氣，
16 給耶穌講：「你有聽著𪜶啲喝什麼無？」
耶穌應講：「有。恁豈無讀著聖經的話：
你互囝仔及嬰仔的嘴大聲唱出謳咾。」
17 後來耶穌離開𪜶，出城去伯大尼，佇遐過暝。
耶穌咒詛無花果樹
18 ( 可 11:12-14, 20-24 )
隔早起，欲倒去耶路撒冷的時，耶穌腹肚枵。
19 伊看著路邊有一欉無花果樹，就行倚去，毋拘樹頂攏無看著半項，只有葉若定。伊對彼欉樹講：「你永遠𣍐閣結果子。」彼欉無花果樹隨時焦去。
20 門徒看著，真著驚，講：「此欉無花果樹哪會忽然間焦去？」
21 耶穌應講：「我實在給恁講，恁若有信心，無憢疑，毋若會當做我對此欉無花果樹所做的代誌，甚至命令此座山講『起來，去填海』嘛一定會實現。
22 祈禱的時，恁所求的一切，有信就會得著。」
質問耶穌的權柄
23 ( 可 11:27-33 路 20:1-8 )
耶穌入去聖殿啲教示人的時，祭司長及民間的長老來伊遐，對伊講：「你靠什麼權柄做諸個代誌？什麼人互你此個權柄？」
24 耶穌應講：「我嘛欲問恁一句話，恁若給我應，我才給恁講我靠什麼權柄做諸個代誌。
25 約翰給人洗禮的權柄對叨位來，是對天抑是對人？」
𪜶互相議論講：「咱若講『對天』，伊會給咱講『按呢，恁是按怎無信約翰？』
26 咱若講『對人』，恐驚群眾反感，因為𪜶攏想講約翰是先知。」
27 𪜶就應耶穌：「阮毋知。」
耶穌給𪜶講：「按呢，我嘛毋給恁講我靠什麼權柄做諸個代誌。」
兩個子的譬喻
28 耶穌講：「恁想按怎？有一個人有兩個子；伊去給大子講：『子啊，你今仔日去葡萄園做工。』
29 大子應講『我毋去』，後來改變心意有去。
30 老父嘛去給第二子講像款的話。第二子應講『阿爸，我來去』，後來無去。
31 此兩個子叨一個有照老父的意思去做？」
𪜶講：「大子。」
耶穌給𪜶講：「我實在給恁講，貿稅的及娼妓會比恁先進入上帝國。
32 因為施洗者約翰來恁遮，指示恁行正路，恁無信伊，毋拘貿稅的及娼妓有信。甚至恁看著了後嘛無悔改來信伊。」
歹佃農的譬喻
33 ( 可 12:1-12 路 20:9-19 )
耶穌給𪜶講：「恁閣聽一個譬喻。有一個園主開墾一坵葡萄園，四面圍籬笆，內面挖一個酒窟，起一個守望台，將此坵園租互佃農，後來出外去真遠的所在。
34 收成果子的時到，園主差僕人去佃農遐，欲對𪜶收果子。
35 佃農給諸個僕人掠起來，一個給伊拍，一個給伊刣死，一個用石頭給伊抌死。
36 園主閣差另外一寡僕人去，比頭一遍較多人。佃農嘛照按呢對待𪜶。
37 最後，園主差家己的子去𪜶遐，想講『𪜶會尊重我的子』。
38 毋拘佃農一下看著伊的子就參詳講：『此個是伊的繼承人。來，咱來給刣死，通得伊的財產！』
39 𪜶就給伊掠起來，㧒出去葡萄園的外面，給伊刣死。
40 「按呢，葡萄園的主人倒來的時會按怎處理許個佃農？」
41 𪜶給耶穌講：「伊一定會將許個歹人徹底消滅，將葡萄園租互別個會照季節納果子租的佃農。」
42 耶穌給𪜶講：「恁豈毋曾讀著聖經有記載：
起厝師傅所棄拺的石，
已經成做上重要的基石。
這是主的作為，
對咱來看實在真奇妙！
43 「所以，我給恁講，上帝會將上帝國對恁搶起來，交互會結果子的人。
44 彼個摔落去此塊石頭頂的人，會摔甲碎骨分屍；互彼塊石頭硩著的人，會硩甲碎糊糊。」
45 諸個祭司長及法利賽派的人聽著耶穌的譬喻，知影伊是啲講𪜶。
46 𪜶就尋孔縫欲給伊掠，毋拘驚群眾，因為𪜶看伊是先知。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。