上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
馬太福音
19
關係離婚的教示
( 可 10:1-12 )
耶穌講諸個話了後，離開加利利去約旦河對岸的猶太地區。
2 有歸大陣的人隨伊，伊就佇遐醫好𪜶的病。
3 有一寡法利賽派的人來試探伊，講：「人無論什麼理由都通離伊的某，有合律法無？」
4 耶穌應講：「恁豈無讀著創造主佇起頭創造人有男有女？
5 上帝講：『因為此個理由，人會離開父母，及伊的某結合，兩人成做一體。』
6 按呢，𪜶已經毋是兩個，是一體。所以，上帝所配合的，人毋通拆開。」
7 法利賽派的人問伊講：「若按呢，摩西是按怎命令人互伊的某一張離婚書就通給伊離？」
8 耶穌應講：「因為恁的心硬，摩西才容允恁離恁的某。起頭創造的時上帝的意思並毋是按呢。
9 我給恁講，若毋是因為某不貞，𣍐用得給伊離，若給伊離閣娶別個婦仁人就是犯姦淫。」
10 門徒給伊講：「既然夫婦的關係是按呢，寧可結婚較好。」
11 耶穌給𪜶講：「此個話毋是逐個人攏會當接受，只有有此款恩賜的人才會。
12 有人對出世就無適合結婚；有人是人為的原因𣍐當結婚；嘛有人是為著天國的緣故無愛結婚。會當接受的人著接受。」
耶穌祝福囝仔
13 ( 可 10:13-16 路 18:15-17 )
有人導囝仔來耶穌遐，愛伊給𪜶按手祈禱。門徒責備許個人。
14 毋拘耶穌講：「互囝仔來我遮，毋通給𪜶阻擋，因為天國是此款人的。」
15 伊就給𪜶按手祝福，然後離開遐。
好額的少年人來見耶穌
16 ( 可 10:17-31 路 18:18-30 )
有一遍，有一個人來尋耶穌，對伊講：「老師，我著做什麼好事才會當得著永遠的活命？」
17 耶穌應講：「你哪會問我關係好的事？只有一位是好。你若愛進入永遠的活命，著遵守誡命。」
18 伊問耶穌講：「是叨一條誡命？」
耶穌應講：「毋通害死人；毋通姦淫；毋通偷提；毋通作偽證；
19 著孝敬父母；著疼厝邊親像疼家己。」
20 此個少年人給伊講：「諸個我一直有啲遵守，猶欠什麼？」
21 耶穌應講：「你若愛做完全的人，你去，去賣你的財產，分互散赤人，你佇天頂就有財寶，然後來隨我。」
22 少年人聽著此個話，就憂憂愁愁離開；因為伊財產真多。
23 耶穌就給伊的門徒講：「我實在給恁講，好額人入天國實在真困難！
24 我閣給恁講，駱駝穿過針鼻嘛比好額人入上帝國閣較簡單。」
25 門徒聽著，真著驚，講：「若按呢，什麼人會當得著救？」
26 耶穌注目給𪜶看，講：「此個事，人做𣍐到，毋拘上帝逐項攏會。」
27 彼得應講：「阮已經放拺一切來隨你啦，阮會得著什麼？」
28 耶穌對𪜶講：「我實在給恁講，將來的新世界，人子坐佇伊榮光的寶座的時，恁隨我的人會坐佇十二個寶座來審判以色列的十二支族。
29 為著我的名放拺家己的厝、兄弟、姊妹、父母、子兒，抑是田園的人，攏會得著百倍的報賞，閣承受永遠的活命。
30 總是真多做頭前的會做上路尾；上路尾的會做上頭前。」
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。