上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
馬太福音
15
祖先的傳統
( 可 7:1-13 )
有法利賽派的人及經學教師對耶路撒冷來見耶穌，問伊講：
2 「是按怎你的門徒無先洗手就食飯，違犯古早人的傳統？」
3 伊應講：「恁是按怎因為恁的傳統來違犯上帝的誡命？
4 上帝講『著孝敬父母』；閣講『罵老父抑是罵老母的人應該處死』。
5 毋拘恁講：『人若對家己的老父抑是老母講：我應該互你的已經獻互上帝，
6 伊就無需要孝敬老父。』按呢，恁因為家己的傳統廢除上帝的話。
7 恁假好的人，以賽亞所講關係恁的預言真著；伊講：
8 此個子民用嘴唇尊敬我，
𪜶的心卻離開我遠遠。
9 𪜶用人的規例做我的教示教示人；
𪜶敬拜我攏無採工。」
什麼才會互人無清氣
10 ( 可 7:14-23 )
耶穌叫眾人來，給𪜶講：「著聽，著了解：
11 毋是對嘴入去的互人無清氣，是對嘴出來的才互人無清氣。」
12 門徒來對伊講：「法利賽派的人聽著你此個話真反感，你知無？」
13 伊應講：「毋是我的天父栽種的，攏欲給伊摳起來。
14 出在𪜶講。𪜶是睛瞑啲牽睛瞑；若睛瞑牽睛瞑，兩個攏會跋落窟仔。」
15 彼得應伊講：「請你給阮解說此個譬喻。」
16 伊就講：「連恁都猶無明白噢？
17 恁豈無了解，所有對嘴入的攏入去腹肚內，後來放落去便所？
18 對嘴出來的是對心出，這才會互人無清氣。
19 因為對心出來的有歹念頭、凶殺、私通、姦淫、偷提、偽證，及誹謗。
20 諸個才會互人無清氣；無洗手就食飯，𣍐互人無清氣。」
迦南婦仁人的信心
21 ( 可 7:24-30 )
耶穌離開彼所在，退去泰爾及西頓的境內。
22 抵好有一個迦南的婦仁人對彼地區來，大聲喝：「主啊，大闢的子，憐憫我！我的查某子互鬼附身，真艱苦。」
23 耶穌無給伊應半句。伊的門徒來求伊講：「給伊趕走，伊隨佇咱後面直直啲喝。」
24 耶穌應講：「我受差派只有是欲尋以色列家失落的羊。」
25 毋拘婦仁人來跪佇伊的面前，講：「主啊，請幫贊我！」
26 耶穌講：「提囝仔的食物㧒互狗仔食，毋好。」
27 婦仁人講：「主，是啦，狗仔嘛有食主人桌頂落落來的餅幼仔。」
28 後來，耶穌應講：「婦仁人，你的信心真大。互你的心願實現！」伊的查某子佇彼陣就得著醫好。
醫好逐款病人
29 耶穌離開彼所在，沿加利利湖邊行，後來上山，佇遐坐。
30 有真大陣的人導腳手瘸去、腳跛、目睭無看見、嘴𣍐講話，及真多有別款病的人來耶穌遐，下佇伊的腳前，伊就給𪜶醫好。
31 眾人看著𣍐講話的人會講話，手瘸去的人復原，腳跛的人會行，𣍐看見的人會看見，真著驚，就歸榮光互以色列的上帝。
互四千人食飽
32 ( 可 8:1-10 )
耶穌叫伊的門徒來，給𪜶講：「我真可憐此陣人，因為𪜶已經及我做夥三日久，現在無物通食啦。我毋甘互𪜶四散枵枵轉去，驚了𪜶佇路中暈倒。」
33 門徒給伊講：「佇此個偏僻無人住的所在，阮欲去叨位提赫多餅來互即多人食？」
34 耶穌問𪜶講：「恁有偌多餅？」
𪜶講：「七個；嘛有幾尾仔細尾魚。」
35 伊命令群眾坐落去土腳，
36 然後提彼七個餅及許個魚，感謝，擘開，提互門徒，門徒就提互群眾。
37 眾人攏食，食到飽；𪜶拾食賰的碎屑仔，貯滿七籠。
38 食的人，婦仁人及囝仔無算，干焦查甫人就有四千。
39 耶穌解散群眾了後，上船去馬加丹地區。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。