上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
馬太福音
14
施洗者約翰的死
( 可 6:14-29 路 9:7-9 )
彼時，加利利分封的王希律聽著耶穌的名聲，
2 就對伊的部下講：「此個人是施洗者約翰，伊已經對死人中閣活，所以才有權能行諸個神跡。」
3 原來，希律為著伊的小弟腓力的某希羅底的緣故有掠約翰，給伊鍊起來，關落監。
4 因為約翰定定對伊講：「你娶此個婦仁人做某無合法。」
5 希律想欲給伊刣，不過驚群眾，因為𪜶攏想講伊是先知。
6 希律作生日的時，希羅底的查某子佇來賓面前跳舞；希律真歡喜，
7 就咒誓答應彼個查某囝仔無論求什麼攏欲互伊。
8 查某囝仔互老母使弄，就講：「請將施洗者約翰的頭殼囥佇盤裡互我。」
9 王的心真艱苦，不過因為已經佇貴賓的面前咒誓，就命令照所求的互伊。
10 王差人去監裡斬約翰的頭，
11 將頭殼下佇盤裡，交互查某囝仔，查某囝仔就捧去互伊的老母。
12 約翰的門徒來收伊的身屍去埋葬，然後去給耶穌報告。
耶穌互五千人食飽
13 ( 可 6:30-44 路 9:10-17 約 6:1-14 )
耶穌聽著此個消息就離開遐，干焦家己坐船退去偏僻無人住的所在。一大陣人聽著就對逐城市行路隨伊。
14 耶穌上岸，看著一大陣人就可憐𪜶，醫好𪜶的病。
15 黃昏暗，門徒倚來給伊講：「遮是偏僻的所在，天嘛啲暗啊；請給群眾解散，互𪜶通家己去附近的庄社買食物。」
16 耶穌應講：「𪜶毋免去，恁互𪜶食。」
17 門徒對伊講：「咱遮只有五個餅，兩尾魚。」
18 耶穌講：「提來遮互我。」
19 伊就叫眾人坐佇草埔，然後提彼五個餅及兩尾魚，向天感謝；餅擘開，提互門徒，門徒就分互眾人。
20 大家攏食，食到飽。門徒拾食賰的碎屑仔，滿十二籃。
21 食的人，婦仁人及囝仔無算，約有五千個查甫人。
耶穌佇湖的頂面行
22 ( 可 6:45-52 約 6:16-21 )
耶穌隨時迫門徒上船先過去對面岸，伊家己留啲解散群眾。
23 群眾四散了後，伊家己上山祈禱。天暗的時，伊猶家己一個佇遐。
24 彼時，船已經離岸真遠，因為搢風互湧撥來撥去。
25 天欲光的時，耶穌佇湖的頂面向門徒遐行去。
26 門徒看著伊佇湖的頂面啲行，真著驚，講：「是鬼！」𪜶驚甲大聲喝出來。
27 耶穌隨時給𪜶講：「安心，是我，毋免驚！」
28 彼得應講：「主啊，若真正是你，命令我行水面去你遐。」
29 耶穌講：「來！」彼得就對船頂落來，行水面去耶穌遐。
30 彼得一下看著風赫呢大就驚，煞欲沉落去，大聲喝：「主啊，救咧噢！」
31 耶穌隨時伸手給伊扭啲，講：「小信的人，是按怎啲憢疑？」
32 𪜶上船，風就恬去。
33 船頂的人跪落去拜伊，講：「你真正是上帝的子！」
耶穌醫好革尼撒勒的病人
34 ( 可 6:53-56 )
耶穌及門徒過湖了後，佇革尼撒勒上岸。
35 彼所在的人一下認出耶穌，就派人去四周圍給所有的病人攏導來伊遐。
36 𪜶懇求耶穌互病人干焦摸伊衫仔裾的鬚就好；所有摸著的人攏得著醫好。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。