上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
馬太福音
7
批判人
( 路 6:37-38, 41-42 )
「毋通批判人，才免受上帝審判。
2 因為恁用什麼標準批判人，上帝嘛會照按呢給恁審判；恁用什麼量量互人，上帝嘛會照按呢量互恁。
3 你哪干焦啲看兄弟目睭內的柴幼仔，亦無注意著家己目睭內有柴箍？
4 你家己目睭內有柴箍，哪會當給你的兄弟講『你目睭內有柴幼仔，我給你提出來』？
5 假好的人，家己目睭內的柴箍著先提出來，才會當看清楚通給兄弟目睭內的柴幼仔提出來。
6 「毋通提神聖的物互狗，𪜶會越過來咬恁；嘛毋通將恁的真珠㧒佇豬的面前，𪜶會用腳踐踏。」
求，尋，拍門
7 ( 路 11:9-13 )
「求，會得著；尋，會尋著；拍門，會給恁開。
8 因為求的，就得著；尋的，就尋著；拍門的，就給伊開。
9 恁中間豈有人，𪜶子給伊討麵包，會提石頭互伊？
10 給伊討魚，會掠蛇互伊？
11 恁雖然歹，猶會曉提好物互恁的子兒，何況恁的天父，伊一定會提好物互對伊祈求的人！
12 「所以，恁愛人按怎對待恁，嘛著按呢對待𪜶。這就是律法及先知的教示。」
狹的門
13 ( 路 13:24 )
「恁著對彼個狹的門入去；因為迵到滅亡彼個門闊，彼條路好行，入去的人真多。
14 迵到活命彼個門狹，彼條路細，尋著的人真少。」
樹及果子
15 ( 路 6:43-44 )
「著防備假先知。𪜶來恁遮，外表親像綿羊，內面卻是兇惡的豺狼。
16 恁會當對𪜶的果子來識𪜶。豈會當對莿挽葡萄？抑是對蒺藜挽無花果？
17 按呢，好樹結好果子；歹樹結歹果子。
18 好樹𣍐結歹果子；歹樹嘛𣍐結好果子。
19 𣍐結好果子的樹攏著剉起來，㧒落火。
20 按呢，恁會當對𪜶的果子來識𪜶。」
我毋識恁
21 ( 路 13:25-27 )
「稱呼我『主啊，主啊』的人，𣍐攏入天國；只有實行我的天父的旨意的人才會。
22 佇彼日，有真多人會對我講：『主啊，主啊，阮豈毋是曾奉你的名傳信息，曾奉你的名趕鬼，曾奉你的名行真多神跡？』
23 彼時我會明明對𪜶講：『我攏毋識恁。恁諸個做歹的人，攏離開我！』」
兩款地基
24 ( 路 6:47-49 )
「所以，聽我諸個話閣實行的人攏親像聰明的人給厝起佇石磐頂，
25 雨潑，大水來，風掃，沖著厝，厝嘛𣍐倒，因為起佇石磐頂。
26 「聽我諸個話無實行的人親像戇人給厝起佇沙頂，
27 雨潑，大水來，風掃，沖著厝，厝就倒，閣倒甲真厲害。」
耶穌的權威
28 耶穌諸個話講煞，群眾對伊的教示感覺非常希奇，
29 因為伊的教示真有權威，及𪜶的經學教師無仝款。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。