上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
馬太福音
4
耶穌受試探
( 可 1:12-13 路 4:1-13 )
後來，耶穌互聖神導去曠野，佇遐受魔鬼試探。
2 耶穌禁食四十暝日，後來就枵。
3 試探者倚來對伊講：「既然你是上帝的子，命令諸個石頭變做餅！」
4 耶穌應講：「聖經有記載：
人啲活毋若倚靠餅，
是倚靠對上帝的嘴所出的逐句話。」
5 然後，魔鬼導耶穌入去聖殿，互伊徛佇聖殿厝頂上高的所在，
6 對伊講：「既然你是上帝的子，跳落去！因為聖經有記載：
上帝會為著你命令伊的天使，
𪜶會用手扶你，
互你的腳𣍐磕著石頭。」
7 耶穌應講：「聖經閣有記載：
毋通試探主 — 你的上帝。」
8 魔鬼閣導耶穌上一個真高的山，將世上萬國及𪜶的榮華互伊看，
9 對伊講：「你若仆落來拜我，諸個一切我攏互你。」
10 耶穌應講：「撒旦，走！聖經有記載：
著拜主 — 你的上帝，
只有服事伊。」
11 然後魔鬼離開耶穌；有天使來給伊侍候。
耶穌佇加利利開始傳道
12 ( 可 1:14-15 路 4:14-15 )
耶穌聽著約翰互人掠去就退去加利利。
13 伊離開拿撒勒去住佇西布倫及拿弗他利地區，加利利湖邊的迦百農。
14 這是欲應驗通過先知以賽亞所講的話：
15 西布倫的地，拿弗他利的地，
沿海的路，約旦河東岸，
外邦人的加利利，
16 𫢶佇烏暗中的人有看見大光；
𫢶佇死蔭的地的有光照𪜶。
17 對彼時，耶穌開始宣揚講：「著悔改，因為天國啲欲實現啦！」
耶穌呼召四個掠魚的
18 ( 可 1:16-20 路 5:1-11 )
耶穌佇加利利湖邊啲行的時，看著兩個兄弟，叫做彼得的西門及伊的小弟安得烈，佇湖裡啲拋網，因為𪜶是掠魚的。
19 伊對𪜶講：「來隨我，我欲互恁得著人親像掠魚的得著魚。」
20 𪜶隨時給網放咧，去隨耶穌。
21 耶穌行進前，看著另外兩個兄弟，西庇太的子雅各及伊的小弟約翰。𪜶及老父西庇太佇船頂啲整理網，伊就呼召𪜶。
22 𪜶隨時將船及老父放咧，去隨耶穌。
耶穌佇加利利傳道
23 ( 路 6:17-19 )
耶穌到加利利逐所在，佇𪜶的會堂教示人，傳天國的福音，醫好民間逐款的病症。
24 伊的名聲傳到敘利亞的逐所在。人將所有的病人，就是邪神附身、羊眩，及半身不遂等，患著逐款症頭及病疼的人攏導來伊遐，伊就給𪜶醫好。
25 有一大陣人對加利利、低加坡里、耶路撒冷、猶太，及約旦河東岸來隨伊。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。