上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
約珥書
2
草蜢毀壞大地
恁著佇錫安歕哨角，
佇我的聖山發警報；
國內的住民攏會愕愕惙，
因為上主的日啲欲到，
已經近啦。
2 彼日烏天暗地；
彼日烏雲密布；
有一隊大閣強的草蜢逼倚，
親像烏暗罩滿山嶺。
此款情境到今毋曾有，
以後代代嘛𣍐閣有。
3 𪜶頭前有烈火啲吞滅，
後面有火焰啲𤏸。
𪜶猶未到，地親像伊甸園；
𪜶過了，地成做拋荒的曠野，
無半項會當逃閃。
4 𪜶的形狀親像馬，
奔走親像戰馬。
5 𪜶佇眾山頂面啲跳，
聲親像戰車浪浪響，
親像火焰燒焦草嗶爆叫；
𪜶親像強猛的軍隊排陣欲出戰。
6 所有看著𪜶的人攏破膽，
面青筍筍。
7 𪜶親像勇士奔走，
親像戰士𬦰上城牆；
𪜶會曉照家己的路線進攻，
𣍐拍亂隊伍。
8 𪜶𣍐揢來揢去，
逐個照路線進攻；
𪜶衝過防衛線，
猶保持隊形。
9 𪜶衝入城，
佇城牆頂闖來闖去，
𬦰上厝頂；
親像賊對窗仔入去厝內。
10 𪜶一下出現，
地振動，天搖泏，
日月無光，星辰暗淡。
11 上主佇伊的軍隊頭前發號令，
伊的軍兵算𣍐了；
執行伊命令的真強猛。
上主的日大閣通驚，
啥人忍受會牢？
呼籲悔改
12 上主講：現在猶未慢，
恁著用禁食，啼哭，哀傷，
越倒轉全心歸向我。
13 著拆裂恁的心，毋是拆裂恁的衫；
著歸向上主 — 恁的上帝，
因為伊有恩惠憐憫，𣍐快受氣，
有豐盛的慈愛，
會改變心意，𣍐降災禍。
14 無定著上主 — 恁的上帝會改變心意，
留福氣互恁，
按呢恁就通獻素祭及奠酒祭互伊。
15 恁著佇錫安歕哨角，
設一個聖日來禁食，
召集嚴肅會，
16 聚集民眾，聖化會眾；
招集序大，
聚集囝仔及食奶的嬰仔；
新郎著離開伊的厝，
新娘離開伊的房。
17 服事上主的祭司著佇走廊及祭壇的中間啼哭。
𪜶著講：「上主，求你寬赦你的子民；
毋通互你的子民受凌辱，
受列國恥笑。
哪著互萬民講『𪜶的上帝佇叨位』？」
上帝閣賜福
18 彼時上主會深深疼惜伊的土地，
閣憐憫伊的子民。
19 上主應伊的子民，講：
「我欲賜恁五穀、新酒，及新油，
互恁心滿意足；
我𣍐閣互恁受列國凌辱。
20 我欲互北方來的軍隊離開恁遠遠，
給𪜶趕去曠旱拋荒的地：
前隊趕入東旁的死海，
後隊趕入西旁的地中海；
𪜶屍體的歹味淐高，臭味沖天。
確實，上主有完成諸個大代誌！」
21 土地啊，毋免驚，著歡喜快樂。
上主確實有做大代誌！
22 田野的走獸啊，毋免驚，
因為曠野的草埔變青翠，
樹木結果子；
無花果樹、葡萄樹攏結真多果子。
23 錫安的子民啊，恁著歡喜，
著因為上主 — 恁的上帝快樂。
伊照時落秋天的雨互恁；
及以前仝款，閣給恁落春霖秋雨。
24 五穀場有滿滿的五穀，
酒窟有新酒，油窟有新油滿出來。
25 我派來恁遮一群閣一群的草蜢大軍，
草蜢、草蜢仔子、草蜢公，及大隻草蜢，
幾若年給恁食去的農作物，
我攏欲補償恁。
26 恁有真多通食，食到飽，
閣會稱讚上主 — 恁的上帝的名；
因為伊為著恁做奇妙的事。
我的子民永遠𣍐閣失敗見笑。
27 恁就會知我佇以色列人中間，
閣知只有我是上主 — 恁的上帝，以外無別個；
我的子民永遠𣍐閣失敗見笑。
上主的日
28 以後，我欲將我的神摒落去互所有的人；
恁的子，查某子會講預言，
恁的老人會作夢，
少年人會看見異象。
29 佇許個日，我甚至欲將我的神摒落去互僕人及女婢。
30 我欲佇天頂顯出奇事，
佇地上有血，有火，及火燻的柱。
31 佇上主大閣通驚的日來臨以前，
日頭會變做烏暗，
月變做親像血赫呢紅。
32 彼時，求叫上主的名的人攏會得著救。
照上主的應允，
佇錫安山及佇耶路撒冷有逃脫的人；
佇諸個賰落來的子民中間有上主選召的人。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。