上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
何西阿書
2 以色列人啊，著給恁的兄弟叫做「我的子民」，給恁的姊妹叫做「所疼惜的」。
不貞的歌蜜 — 不忠的以色列
2 去告恁老母，及伊理論。
伊豈毋是我的某，我豈毋是伊的翁？
叫伊除去淫亂的面容，引誘人的胸坎，
3 才免我給伊褪光光，親像抵仔出世彼日的款式，
才免我互伊親像曠野焦燥的地，嘴焦到死。
4 我無欲疼伊的子兒，
因為𪜶是對淫亂生的。
5 𪜶的老母行淫亂，
做見笑事生𪜶；
伊講：我欲去隨我的愛人；
我的羊毛、麻布、餅、水、油及所飲的，攏是𪜶互我的。
6 因為按呢，我欲用刺仔塞伊的路，
造牆互伊尋無路。
7 伊欲去趇許個情人，毋拘趇𣍐著，
欲尋嘛尋𣍐著。
伊就講：「我欲倒去尋原來的丈夫，
因為我前的景況比現在較好。」
8 伊毋知伊的五穀、新酒、新油，攏是我互伊的；
伊服事巴力的金及銀，嘛是我互伊的。
9 所以，收割的時抑是出新酒的時，我欲將我的五穀及新酒給提倒轉，
嘛欲將我互伊遮蓋身軀的羊毛及麻布給搶倒轉。
10 我欲互伊佇伊的情人的目睭前赤身露體致到見笑；
無人會當救伊脫離我的手。
11 我欲互伊𣍐當閣有宴樂，
無閣有初一、安歇日，及其他的節日。
12 我嘛欲毀壞伊的葡萄樹、無花果樹，
因為伊講諸個是伊的情人互伊的報賞；
我欲互伊的果子園拋荒，出在野獸踐踏吞食。
13 伊以前燒香服事巴力，
用耳鉤及逐種裝飾品，妝媠媠去隨伊許個情人，煞𣍐記得我，
所以我欲給伊處罰。這是上主講的。
14 按呢，我欲招伊來去曠野，輕聲細說及伊講話。
15 佇遐我欲將伊的葡萄園還伊，
閣給「災難」的山谷變做「向望」的門；
佇遐伊會應答我，親像伊少年的時，
親像伊出埃及的日。
16 上主講：「佇彼日你欲稱呼我『阮翁』，無閣稱呼我『阮頭家』。
17 我無欲互伊閣求叫巴力，欲互伊𣍐記得此個名。
18 「佇彼日，我欲為著我的子民及田野的動物、空中的飛鳥，以及地上的蟲𧒴立約；我嘛欲摃斷地面上的弓、刀，及所有的武器，互𪜶通安然倒落去歇睏。
19 「我欲娶你永遠做我的某，用公義、公平、慈愛、憐憫做聘金給你娶。
20 我嘛欲用忠實做聘金娶你，你就會真正識上主。」
21 上主講：佇彼日，我欲應答我子民的祈求，
欲互天落雨，灌沃土地，
22 互地出產五穀、新酒及油，
用諸個應答耶斯列。
23 我欲為著我家己給伊栽種佇此塊土地；
我欲疼惜羅‧露哈瑪，
欲對羅‧阿米講「你是我的子民」；
𪜶會應講「你是阮的上帝」。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。