上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
但以理書
9
但以理為同胞祈禱
米底亞人亞哈隨魯的子大流士統治巴比倫國第一年，
2 就是伊作王的元年，我但以理佇經典讀著上主啟示先知耶利米關係耶路撒冷會荒廢七十年的記載。
3 我就向主上帝祈禱，懇求，禁食，穿麻衫，糝火灰，對伊求問此個事。
4 我向上主 — 我的上帝祈禱，認罪講：「主啊，你是至大通驚畏的上帝，守約施慈愛互所有疼你，遵行你誡命的人。
5 「阮有犯罪，行不義的事，做歹，背叛你的誡命及規例；
6 你的僕人眾先知曾奉你的名對阮的君王、官長、祖先，及全國人民講話，毋拘阮攏無聽趁。
7 主啊，你是公義的；阮諸個猶大人、耶路撒冷住民，以及互你趕去遠近逐國的以色列人民，對古早到現在攏仝款自取見笑，因為阮背逆你。
8 上主啊，阮及阮的君王、官長、祖先有得罪你，致到滿面見笑。
9-10 毋拘雖然阮背叛你，毋聽你的話，無順趁你通過你的僕人眾先知對阮宣布的律法，主 — 阮的上帝，你猶久充滿慈愛，閣一直赦免阮。
11 阮所有的以色列人有違反你的律法，偏離，毋聽趁你的話，所以你的僕人摩西的律法所記載的咒詛，及上帝立誓欲降的災禍，就摒佇阮身上。阮實在有得罪你！
12 你有實現你對阮及統治阮的官長所講警戒的話，互大災禍臨到阮；耶路撒冷受著的，是天下無一個城市曾抵著的災難。
13 你互摩西律法所記載的災禍，攏臨到阮身上，毋拘阮竟然無懇求上主 — 阮的上帝施恩，互阮越轉身離開罪惡，明白你信實的話。
14 對按呢，上主決意互災禍臨到阮，因為上主 — 阮的上帝的所做攏是公義；毋拘阮無聽趁你的話。
15 「主 — 阮的上帝，你曾用大權能的手導你的子民脫離埃及；佇彼時，你就顯出及今仔日仝款的名聲。毋拘，到今阮猶啲犯罪做歹。
16 主啊，求你照你的公義，無互你極大的受氣閣臨到此個城，就是你的聖山耶路撒冷，因為耶路撒冷及你的子民為著阮及阮的祖先的罪過受周圍的人凌辱。
17 阮的上帝，今求你俯落聽你的僕人的祈禱懇求。主啊，求你因為你家己的緣故，看顧你荒廢的聖所。
18 我的上帝啊，求你俯耳孔聽你僕人的祈禱，開你的目睭看阮許個拋荒的土地以及用你的名建立的城；阮向你祈禱，毋是靠家己的好行為，是因為你豐富的慈悲憐憫。
19 主啊，求你聽！主啊，求你赦免！主啊，求你採取行動！我的上帝，求你為著你家己的緣故毋通延遲，因為此個城、諸個子民攏是你的。」
加百列解說異象
20 我繼續講話祈禱，承認我及我的同胞以色列的罪，為著我的上帝的聖山向上主 — 我的上帝懇求。
21 我抵啲祈禱的時，抵即佇異象中看見彼位加百列，大約佇獻下昏祭的時真緊飛來我遮。
22 伊給我解說，講：「但以理，我現在來是欲互你完全明白。
23 你開始祈禱的時，上帝就命令我來給你講：你是上帝所疼的人，所以著注意此個信息，了解此個異象。
24 「上帝為著你的同胞及聖城指定一段時間，就是七十禮拜。彼時，恁無閣背叛，罪得著赦免，罪過得著擦消，永遠的公義開始實踐，異象及預言得著應驗，閣再給至聖所抹油。
25 所以你著清楚了解，對下令重建耶路撒冷到受抹油選立的領袖出現，此中間著有七禮拜，閣經過六十二禮拜，耶路撒冷以及伊的街路及河溝會佇艱難的中間重建完成。
26 六十二禮拜過了，受抹油選立的領袖會受剪除，無人續接伊。後來有一個王會導軍隊來毀滅此個城及聖所，伊的結局會親像大水沖來，閣會有戰爭，最後逐四界攏變做拋荒。
27 伊會佇一禮拜內及真多人結盟；佇一禮拜的一半禁止人向上帝獻祭及奉獻禮物，閣將可惡、會造成毀滅的物𫞼佇聖殿，直到指定的結局實現佇彼個毀滅者身上。」
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。