上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
但以理書
5
伯沙撒王的宴會
伯沙撒王舉行大宴會，邀請一千個大臣來及伊做夥飲酒。
2 伯沙撒飲酒飲到爽快的時，伊命令人將伊的祖先尼布甲尼撒對耶路撒冷的聖殿搶來的金器銀器搬出來，互王及許個大臣，以及王的后妃貯酒飲。
3 人就將對耶路撒冷上帝的聖殿搶來的器具，提來互王、大臣，及后妃飲酒。
4 𪜶那飲酒，那謳咾𪜶用金、銀、銅、鐵、柴、石頭造的神明。
5 彼時，忽然出現一支人的指頭仔，佇王宮燈台對面的石灰壁寫字。王看著寫字的手，
6 面就失色，非常驚惶，腰骨無力，腳頭窩硞硞趒。
7 王大聲喝，命令許個行法術的、星象家、占卜的攏來到伊遐。王給諸個巴比倫有智慧的人講：「若有人識諸個字，閣會曉給我解說，我就欲賜伊一領紫色的外袍，給伊掛金袚鍊，互伊做全國第三大的。」
8 王所有的顧問攏進前，毋拘𪜶𣍐曉讀許個字，嘛𣍐曉給王解說許個字的意思。
9 伯沙撒王就真驚惶，面失色；伊的大臣嘛毋知欲按怎。
太后推薦但以理
10 太后聽見王及伊的大臣的話，就入去宴會廳，對王講：「大王萬歲！你毋免驚惶失色。
11 你國內有一個人，伊有至聖神明的神，你的祖先尼布甲尼撒在生的時，就發見此個人有洞察力，真聰明，親像神明赫呢有智慧。你的祖先尼布甲尼撒王有設立伊管理術士、行法術的、星象家，及占卜的，
12 是因為伊有非常好的靈性，有智慧及洞察力，會解夢，會解答問題，解說奧祕的事。此個人叫做但以理，尼布甲尼撒王閣給伊號名做伯提沙撒。你現在就通召但以理來，伊會給你解說諸個字的意思。」
但以理解說壁頂的字
13 但以理隨時互人導去見王。王問伊：「你是我的先王對猶大地掠來的猶太人但以理是無？
14 聽講你有至聖神明的神，有洞察力及聰明，閣有智慧。
15 現在我有召諸個顧問及術士來我遮，愛𪜶讀諸個字，閣將內面的意思給我解說，毋拘𪜶攏𣍐曉。
16 我有聽講你真𠢕解說，會解答問題。今，你若會曉讀諸個字，閣解說互我聽，我就欲賜你紫色的外袍，給你掛金袚鍊，閣互你做全國第三大的。」
17 但以理應王講：「請皇上保留你的禮物及賞品，抑是送互別人。今，我欲讀此個文字，閣將內面的意思給王解說。
18 「皇上，至高的上帝有將國家、權柄、光榮、尊嚴賜互你的先王尼布甲尼撒王。
19 因為上帝有將大的權力賜互伊，互諸個民族、邦國，及講逐種語言的人民攏佇伊的面前驚驚惶惶；嘛互伊會當照家己的意思互人死互人活，給人高升，給人降低。
20 毋拘伊內心自高自大，性情固執，眼中無人，所以上帝將伊對王位趕落去，將伊的尊榮搶走。
21 伊就互人趕離開人群，伊的心變做野獸的心，及野驢做夥住，親像牛食草，互露水凍，直到伊承認至高上帝啲掌管世間的國家，照伊的旨意選立人治理。
22 「伯沙撒，你是尼布甲尼撒的後代；雖然知影所有諸個代誌，毋拘你猶原無欲謙卑，
23 竟然自高自大，攻擊天頂的主，派人將天頂的主聖殿內面的器具帶來你遮，互你、你的大臣，及后妃用來飲酒。你閣謳咾許個用金、銀、銅、鐵、柴、石頭造，𣍐看、𣍐聽、什麼攏毋識的神明；顛倒無尊崇彼位決定你生死，掌握你的命運的上帝。
24 所以上帝互一支手出現寫許個字。
25 「許個字是『彌尼，彌尼，提客勒，及比勒斯』，
26 意思是按呢：『彌尼』就是上帝已經計算你的國家的年數，欲互伊結束。
27 『提客勒』就是上帝用天秤給你秤，你無幾兩重。
28 『比勒斯』就是你的國家會分裂，會交互米底亞及波斯。」
29 伯沙撒就下令，給但以理穿紫色的外袍，掛金袚鍊，閣宣布伊做全國第三大的。
30 彼暗，巴比倫王伯沙撒互人刣死。
31 米底亞人大流士六十二歲的時，消滅巴比倫國。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。