上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
但以理書
3
王下令拜金像
尼布甲尼撒王造一座金像，高二十七公尺，闊三公尺，𫞼佇巴比倫省的杜拉平原。
2 伊召集全體總督、省長、縣長、參謀、財務官、法官，及地方官員，來參加伊所造金像的開光典禮。
3 諸個官員攏來參加，徛佇尼布甲尼撒王所造金像的頭前。
4 傳令官大聲宣布：「逐族、逐國、講逐種語言的人民！著注意聽此個命令：
5 恁若聽著號角、𥰔仔、琴、瑟、豎琴、鼓，及逐種樂器的聲，就著隨時仆拜尼布甲尼撒王所造的金像。
6 若有人無欲仆拜，就欲即時給伊掠去㧒落炎火啲燒的窯。」
7 所有的人民，無論屬叨一族、叨一國、講叨一款語言，一下聽著諸個樂器的聲，就攏仆拜王造的金像。
但以理三個朋友受控告
8 彼時，有幾個巴比倫人利用機會惡意控告猶太人，
9 對尼布甲尼撒王講：「願王萬歲！
10 皇上，你有下令，所有聽著號角、𥰔仔、琴、瑟、豎琴、鼓，及逐種樂器的聲的人，攏著仆拜金像；
11 若有人無欲仆拜，就給伊㧒落炎火啲燒的窯。
12 現在，皇上，你派來管理巴比倫省事務此三個猶太人沙得拉、米沙、亞伯尼歌，𪜶無服從你的命令，無欲服事你的神明，無仆拜你造的金像。」
13 尼布甲尼撒王聽了非常受氣，就下令，將沙得拉、米沙、亞伯尼歌帶來到伊的面前。
14 王問𪜶：「沙得拉、米沙、亞伯尼歌，恁豈真正無服事我的神明，無仆拜我𫞼的金像？
15 今，恁著想互好勢，恁一下聽著號角、𥰔仔、琴、瑟、豎琴、鼓，及逐種樂器的聲，若仆拜我造的像，就無代誌；若無，就欲即時給恁㧒落啲燒的火窯。到時，有啥神明會當對我的手頭給恁解救出去？」
16 沙得拉、米沙、亞伯尼歌應王講：「尼布甲尼撒，此個代誌阮毋免給你回答。
17 阮若互你㧒落火窯，阮服事敬拜的上帝會給阮對炎火啲𤏸的火窯救出來；皇上，伊嘛會救阮脫離你的手。
18 就算講毋是按呢，皇上，你著知，阮嘛一定無欲服事你的神明，無欲仆拜你𫞼的金像。」
但以理三個朋友佇火窯
19 尼布甲尼撒一下聽著，對沙得拉、米沙、亞伯尼歌非常受氣，對𪜶變面，就命令人給火窯燃較熱，比平常加七倍燒；
20 閣命令幾若個勇猛的戰士給沙得拉、米沙、亞伯尼歌縛起來，㧒落去炎熱的火窯。
21 此三個人互人縛起來㧒落火窯的時，猶穿外袍、長褲、頭巾，及其他的衫。
22 因為王的命令真緊急，火窯閣真炎熱，許個將𪜶㧒落火窯的人煞互火燒死。
23 沙得拉、米沙、亞伯尼歌攏互人縛啲，㧒落去火窯內面。
24 彼時，尼布甲尼撒驚一趒，趕緊徛起來，對伊的參謀講：「互咱縛起來，㧒落去火窯的，豈毋是三個人？」
𪜶講：「皇上，是。」
25 王講：「恁看！我有看著四個人，無縛啲，佇火窯內面行來行去，閣攏無著傷。彼個第四個看起來親像神明的子。」
彼三個人得著解放閣升官
26 尼布甲尼撒行近炎熱的火窯口，講：「至高上帝的僕人沙得拉、米沙、亞伯尼歌，請出來！來我遮。」彼三個人就對火窯出來。
27 許個總督、省長、縣長，及王的參謀攏聚集倚來看此三個人，看著𪜶身軀無互火燒著，連頭毛嘛無燒著，衫及褲無變色，閣無著火燒的味。
28 尼布甲尼撒就講：「著稱讚沙得拉、米沙、亞伯尼歌的上帝！伊派伊的使者拯救保護所有倚靠伊的僕人。𪜶敢無服從我的命令，甘願犧牲性命，家己的上帝以外，無欲侍奉敬拜其他任何神明。
29 「所以我下令，無論叨一個民族、叨一個邦國、講叨一款語言的人民，若有人褻瀆沙得拉、米沙、亞伯尼歌的上帝，一定著給𪜶斬斷腳手；𪜶的厝欲變做糞埽堆，因為無別個神明會當親像上帝按呢解救人。」
30 後來，王就高升沙得拉、米沙、亞伯尼歌佇巴比倫省的地位。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。