上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
以西結書
48
逐支族分配的土地
下面是逐支族照名單分著的土地：對上北旁，沿希特倫欲去哈馬隘口的路，到大馬士革王國邊界的哈薩‧以難城。北旁到哈馬王國，對東旁的邊界到西旁的地中海是但的份額。
2-7 其他支族的土地，對北到南照順序是但、亞設、拿弗他利、瑪拿西、以法蓮、呂便，及猶大，逐支族攏得著𪜶應得的份額。
中部地區
8 北旁及猶大的地界相接，對東旁的邊界到西旁的地中海，闊十二公里半，大細及逐支族仝款；著奉獻此塊地做聖地，佇彼中間起聖殿。
9 恁著奉獻長十二公里半、闊十公里的地互上主。
10 祭司欲得著此塊聖地的一部份。𪜶分著的地，對東到西十二公里半，對北到南五公里。上主的聖殿欲起佇此塊聖地的中間。
11 此塊聖地欲互撒督後代分別作聖的祭司。𪜶忠實遵守我所吩咐的職份；以色列人行迷路離開我的時，𪜶無親像利未人嘛行迷路。
12 所以，此塊地欲保留一部份互𪜶，做至聖的土地，及利未支族的地界相接。
13 利未支族欲佇祭司的土地南旁分著一塊地，及祭司的地平大；對東到西十二公里半，對北到南五公里。
14 獻互上主的此塊地是上好的土地，𣍐用得賣抑是交換，嘛𣍐用得讓渡互別人。此塊土地是聖的，歸屬上主。
15 聖地猶有賰一塊長十二公里半，闊兩公里半的土地；此塊地欲做一般的公用地，通起城，起厝，做草場。城著起佇此塊地的中央。
16 城的大細，東、西、南、北四旁攏是兩千兩百五十公尺。
17 城的四周圍著有草場，東、西、南、北四面，闊攏是一百二十五公尺。
18 公用地兩旁猶有賰土地，及聖地相連，東旁及西旁各長五公里；諸個地通種作，出產的著做佇城內工作的人的食物。
19 所有佇城內工作的人，無論屬以色列叨一支族，攏通佇此塊地種作。
20 恁著將此塊十二公里半四方的聖地，及城的用地，攏奉獻做聖地。
21 聖地及城的用地兩旁賰的土地，著歸屬王。聖地的東旁到東旁邊界的地，南北闊十二公里半；西旁到西旁的地中海，闊嘛是十二公里半。此兩旁及其他支族得著的份額平行的土地，攏歸屬王。按呢，所獻的聖地及欲起聖殿的地，是佇王兩塊地的中間。
22 利未人的地及起城的用地，嘛佇王兩塊地的中間；歸屬王的地是佇猶大的地界及便雅憫的地界中間。
其他支族的土地
23-27 其他支族的土地，對東旁的邊界到西旁的地中海，對北到南照順序是便雅憫、西緬、以薩迦、西布倫，及迦得，逐支族攏得著𪜶應得的份額。
28 迦得支族南旁的邊界，是對他瑪向西南到米利巴‧加低斯綠洲，閣斡對西北，沿埃及邊界的溪谷到地中海。
29 至高的上主按呢講：「諸個是恁欲抽籤分互以色列逐支族，做𪜶產業的土地。」
耶路撒冷的城門
30-34 耶路撒冷城攏總有十二個城門。四旁的城牆長攏是兩千兩百五十公尺，各有三個城門；逐個門照以色列支族的名號名。北旁三個是呂便門、猶大門、利未門；東旁三個是約瑟門、便雅憫門、但門；南旁三個是西緬門、以薩迦門、西布倫門；西旁三個是迦得門、亞設門、拿弗他利門。
35 城牆四周圍共九千公尺。對今以後，此個城欲叫做「上主佇遮」。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。