上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
以西結書
44
東門著關啲
彼個人導我轉來聖殿外埕的東門。彼個門關啲。
2 上主給我講：「此個門一定著關啲，𣍐用得拍開，不准任何人對遮出入，因為我上主 — 以色列的上帝已經對此個門入來。此個門著關啲。
3 若是王，伊通來坐佇內面，佇上主面前食獻過的餅。毋拘，伊著對外埕的走廊出入。」
進入聖殿的規則
4 然後，彼個人導我對北門來到聖殿頭前。佇遐，我看見上主的榮光充滿伊的聖殿；我就仆落去土腳。
5 上主對我講：「人子啊，我所欲吩咐你有關上主聖殿的規則及條例，你著詳細看，注意聽，閣記佇心內；你著注意什麼款人才會用得佇聖殿及聖所出入。
6 「你著給許個背逆的以色列人講：『至高的上主按呢講：以色列人啊，我無欲閣忍受恁所做一切通厭惡的事。
7 恁啲獻牲生的血及油做我食物的時，竟然互許個身軀及心靈無受割禮的外族人入去聖所，拍垃墋我的聖殿。恁做諸個通厭惡的事，違背我的約。
8 恁家己無佇我的聖所盡恁的職責，顛倒叫外族人佇聖所替恁執行。
9 「『我 — 至高的上主按呢宣布：住佇以色列人中間所有身軀及心靈無受割禮的外族人，攏不准進入我的聖所。』」
不准做祭司的利未人
10 上主講：「以色列人行迷路，去拜𪜶的偶像的時，利未人嘛棄拺我；我欲照𪜶的罪刑罰𪜶。
11 毋拘，我欲互𪜶佇我的聖所侍奉，顧守聖殿的門，佇聖殿執行職務。𪜶通替人民刣燒化祭及其他祭祀的牲生，輪班為人民服務。
12 毋拘，因為諸個利未人曾為以色列人主持拜偶像的事，互人民跋倒犯罪，所以，我對𪜶立誓，𪜶一定著受刑罰。我 — 至高的上主按呢宣告。
13 𪜶𣍐當親近我，𣍐當做祭司侍奉我，𣍐當倚近我一切的聖物，抑是至聖的物。這就是𪜶做通厭惡的事應該承受的見笑。
14 我欲指派𪜶顧守聖殿，做聖殿內面應該做的事務。」
祭司
15 「以色列人行迷路離開我遠遠的時，利未支族撒督後代的祭司猶原盡𪜶佇我聖所的職責。所以，只有𪜶通親近我，侍奉我；𪜶欲佇我的面前，獻牲生的油及血互我。我 — 至高的上主按呢宣布。
16 只有𪜶通進入我的聖所，佇我的祭壇侍奉，做我交代的職務。
17 𪜶對門入去內埕的時，著穿幼麻布的衫；𪜶佇內埕及聖殿侍奉的時，毋通穿羊毛做的衣服。
18 𪜶著戴幼麻布的頭巾，穿幼麻布做的禮褲；腰毋通縖帶，才免流汗。
19 𪜶出來外埕會眾遐以前，著先將佇聖殿侍奉穿的禮服褪起來，囥佇聖的房間，然後穿別種衫，才免𪜶的衫互會眾成做聖。
20 「祭司毋通剃光頭，嘛毋通留長頭毛；頭毛著修剪。
21 祭司欲入去內埕的時，𣍐用得飲酒。
22 祭司𣍐用得及一般的寡婦抑是離婚的婦仁人結婚，干焦通及以色列人的在室女抑是祭司的寡婦結婚。
23 「祭司著教導我的子民什麼是聖，什麼是俗；互𪜶知什麼是清氣的抑是無清氣的。
24 若有訴訟需要祭司裁決，祭司著遵照我的命令審判。祭司著佇我所有的節期遵守我的條例及規則，閣守我的安歇日做聖日。
25 「除了過身的人是家己的父母、子兒、兄弟，抑是未出嫁的姊妹，祭司毋通倚近屍體，互家己無清氣。
26 伊潔淨了後，著閣等七日，
27 才通進入聖所的內埕；伊佇聖所侍奉我以前，著為家己獻贖罪祭。我 — 至高的上主按呢宣布。
28 「祭司有產業；我就是𪜶的產業。佇以色列，毋免互𪜶什麼產業；我就是𪜶的產業。
29 素祭、贖罪祭、賠罪祭的祭物欲做祭司的食物；以色列人獻互我的，攏欲歸屬𪜶。
30 頭水的農作物及獻互我的祭物，攏歸互祭司。恁著用頭水的麥仔做的頭一塊無摻酵的麵丸互祭司；按呢我就欲賜福氣互恁。
31 飛鳥抑是走獸，無論是自然死的，抑是互野獸拆裂的，祭司攏毋通食。」
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。