上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
出埃及記
23
正義及公道
「毋通散布謠言；毋通及歹人鬥孔作偽證。
2 毋通隨多數人做歹；佇訴訟，毋通偏倚大旁，作證歪曲正直。
3 佇訴訟，毋通偏袒散赤人。
4 「若抵著你的對敵的牛抑是驢迷路，一定著牽倒來交伊。
5 若看著怨恨你的人的驢載傷重倒落去，毋通行開，著及伊做夥將驢載的物件放落來。
6 「散赤人的案件，你毋通歪曲正義。
7 毋通誣告人；毋通害死無罪及正直的人；因為我一定𣍐給歹人看做正直。
8 毋通收賄賂，因為賄賂會互目金的人變做睛瞑，閣會歪曲正直的人的證詞。
9 「毋通壓制寄居的人；因為恁曾寄居佇埃及，了解出外人的感受。」
安歇年及安歇日
10 「六年內你著耕作，著收成農作物。
11 第七年，著互土地歇睏無耕作，你的人民中間的散赤人通食土地自然出產的物；𪜶食賰的通互野獸食。你的葡萄園及橄欖園嘛著按呢做。
12 「六日內你著做工，第七日著安歇，互牛驢歇睏，互奴隸及寄居的攏通回復元氣。
13 「我命令恁的，恁著遵守；別個神明的名，毋通提起，嘛毋通講互人聽。」
三個重要的節期
14 ( 出 34:18-26 申 16:1-17 )
「一年三遍，你著守節服事我。
15 著守除酵節，照我的命令，佇亞筆月所指定的日期，食無酵餅七日久，因為你佇此個月出埃及。你毋通空手來敬拜我。
16 「你佇園裡勞碌栽種，收成頭水土產的時，著守收割節。
「你佇秋季收囥對園裡勞苦得著的農作物的時，著守收囥節。
17 一年三遍，所有的查甫人著來敬拜至高的上主。
18 「有酵的餅𣍐用得及牲禮做夥獻；節期所獻牲禮的油𣍐用得留到隔早起。
19 「土地頭水上好的收成，著送到上主 — 你的上帝的厝。
「毋通用山羊母的奶煮伊的子。」
應允及警戒
20 「我欲差派使者佇路裡保護恁，導恁去我為著恁準備的地。
21 恁佇伊的面前著切實遵行伊的命令；恁若違背伊，伊無欲赦免恁的過失；因為伊代表我。
22 恁若真正聽趁伊的話，照我所命令恁的去做，恁的對敵就是我的對敵，我欲抵敵恁的敵人。
23 我的使者欲行佇恁的頭前，導恁去亞摩利、赫、比利洗、迦南、希未、耶布斯許個族的地；我欲給𪜶消滅。
24 恁毋通跪拜服事𪜶的神明，嘛毋通學𪜶的所做；著給許個神像全部毀壞，拍碎雕刻的柱像。
25 恁著服事上主 — 恁的上帝；我一定欲將米糧及水賞賜恁，閣互所有的病攏離開恁。
26 我嘛欲互恁境內的婦仁人攏會生育，𣍐流產，互恁食長歲壽。
27 「我欲佇恁的頭前顯出威嚴；恁無論去叨位，我欲互許個人民攏驚惶，互恁的對敵越轉身逃走。
28 我欲降瘟疫佇𪜶中間，給希未人、迦南人、赫人攏趕走。
29 毋拘我𣍐佇一年內將𪜶全部趕出去，才免土地荒廢，野獸增加煞傷害恁。
30 我欲為著恁漸漸將𪜶趕走，聽候恁人口增加，到會當承接彼個地做產業。
31 我欲給恁定國界，對紅海到幼發拉底河，對曠野到地中海；我欲將彼個地徛起的人民交佇恁的手，互恁將𪜶攏趕出去。
32 毋通及遐的人以及𪜶的神明立約。
33 毋通互𪜶住佇恁的地，才免𪜶引誘恁得罪我；恁若服事𪜶的神明，這欲成做害恁的羅網。」
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。