上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
以西結書
32
用海怪比並埃及王
第十二年十二月初一，上主對我講：
2 「人子啊，你著為埃及王做哀歌，給伊講：你想講家己佇列國中是少壯的獅，其實，你是海裡的海怪。你佇江河拍翸，用腳撈水，互河水變濁。
3 至高的上主按呢講：佇真多國家的人民聚集的時，我欲拋我的網給你掠起來，叫𪜶給你拖上岸。
4 我欲給你㧒佇土腳，擲佇野地，互你做空中的飛鳥及地上走獸的食物。
5 我欲給你的身屍擲佇山裡，用你爛去的屍體給山谷填淀。
6 我欲互土地飲你的血；互你的血淹到山嶺，漲滿江河。
7 我消滅你的時，欲遮蓋天，互星辰烏暗；我欲用密雲遮日頭，互月娘嘛𣍐發光。
8 我欲互天頂的光體𣍐閣發光，互你的土地陷入烏暗。我 — 至高的上主按呢宣告。
9 「我互你佇列國中滅亡的消息，傳到你毋識的國家的時，我欲互許個人民的心驚惶。
10 我佇列國面前弄刀劍的時，𪜶的人民欲因為你驚惶，君王嘛欲因為你愕愕惙。你倒壞彼日，𪜶攏欲為著家己的性命不時皮皮惙。
11 「至高的上主按呢講：巴比倫王欲攑刀攻擊你。
12 我欲用𪜶的戰士消滅你的軍隊；𪜶是列國中上兇惡的。埃及的誇耀欲徹底消失，伊的軍隊欲滅亡。
13 我欲刣死河邊的牲生；無閣有人及牲生用腳撈河水，互水濁去。
14 彼時，我欲互𪜶的河水清清，互河水親像油寬寬仔流。我 — 至高的上主按呢宣告。
15 我互埃及拋荒，土地無賰半項，給伊的住民攏刣死的時，𪜶就知我是上主。
16 這是一首人哀傷的時唱的哀歌。列國的女子欲為著埃及及伊的人民唱此首哀歌。至高的上主按呢宣告。」
陰間
17 第十二年某月的十五，上主對我講：
18 「人子啊，你著為埃及的群眾啼哭，𪜶及其他強國的人民欲受㧒落地深的所在，及許個已經佇陰間的人做夥。
19 你著對𪜶講：
你想講你上媠噢？
你落去深坑，去及無受割禮的人做夥！
20 「𪜶欲及許個互刀劍刣死的人倒做夥。刀已經出鞘，埃及及伊的人民攏會互人刣死。
21 佇陰府上強猛的戰士欲給埃及以及及伊結盟的國家講：『許個無受割禮，互刀刣死的人攏落來倒佇遮！』
22 「亞述及伊的戰士攏佇遐，伊的戰士埋佇四周圍；𪜶攏互刀劍刣死。
23 𪜶的墳墓佇陰間極深的所在，伊的戰士埋佇四周圍；𪜶攏是互刀劍刣死的。𪜶在生的時，人非常驚𪜶。
24 「以攔及伊的戰士攏佇遐，伊的戰士埋佇四周圍。許個無受割禮，互刀劍刣死的人攏落佇陰間。𪜶在生的時，人非常驚𪜶；今死了，𪜶及所有死的人像款受侮辱。
25 佇互人刣死的人中間，𪜶為著以攔做一頂眠床，𪜶的戰士攏埋佇四周圍。𪜶是無受割禮，互刀劍刣死的人。𪜶在生的時，人非常驚𪜶；今死了，𪜶及所有死的人像款受侮辱。
26 「米設、土巴及𪜶的戰士嘛佇遐，𪜶的戰士攏埋佇四周圍。𪜶攏是無受割禮，互刀劍刣死的人。𪜶在生的時，人非常驚𪜶。
27 𪜶無及許個古早的勇士做夥埋葬；諸個勇士帶軍器落去陰府，刀劍做枕頭，罪的刑罰蓋佇𪜶的骨頭頂。𪜶在生的時，人非常驚𪜶。
28 「法老，你欲互人碎骨分屍，倒佇無受割禮，互刀劍刣死的人中間。
29 「以東嘛佇遐，伊的王及所有的領袖雖然是勇猛的戰士，毋拘嘛欲及無受割禮、互人刣死，及落陰間的人倒做夥。
30 「所有北方的領袖及西頓人嘛佇遐；𪜶的權勢曾互人恐惶驚惶。今𪜶嘛及無受割禮，互刀劍刣死的人做夥倒佇陰間，受侮辱。」
31 「至高的上主講：埃及王看見許個國家的滅亡，會為著互刀刣死的軍兵感覺安慰。
32 「雖然我曾用埃及王互世間人驚惶，毋拘伊及伊的軍隊嘛攏欲及許個無受割禮、互刀劍刣死的人倒做夥。至高的上主按呢宣告。」
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。