上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
以西結書
29
譴責埃及
第十年十月十二，上主對我講：
2 「人子啊，你著對埃及王及埃及全國講預言，指責𪜶，
3 講：『至高的上主按呢講：埃及王，你親像匿佇河裡的大海怪，我欲及你作對！你曾講尼羅河是你的，是你造的。
4 我欲用鉤仔鉤你的牙槽，互河裡的魚卡佇你的鱗；我欲給你及卡佇你的鱗的魚攏對河裡扭起來。
5 我嘛欲給你及河裡的魚㧒佇曠野。你會死佇野地，無人給你收身屍，無人給你埋葬。我欲互你做地上的野獸及空中飛鳥的食物。
6 按呢，所有埃及的住民就知我是上主。
「『上主閣講：埃及人，你對以色列人講起來，不過是一枝蘆竹仔柺。
7 𪜶用手攑你抵土腳，你就𤿎開，傷著𪜶的肩頭；𪜶的身軀靠你，你就斷去，互𪜶的腰閃著。
8 所以，我 — 至高的上主按呢講：我欲互恁抵著戰亂；人及牲生攏欲互刀刣死。
9 埃及的地欲拋荒荒廢，按呢，人就知我是上主。
「『因為埃及王誇口講：尼羅河是我的，是我造的。
10 我欲及你以及你的河流作對。我欲互埃及的土地，對北部的密奪，到南部的色弗尼，一直到古實邊界，全部拋荒荒廢，
11 無閣有人抑是野獸經過；四十年久，埃及無人徛起。
12 我欲互埃及變做世間上拋荒的所在，互埃及的城鎮變做上荒廢的城鎮。我欲給埃及人趕散去列國，四散佇列邦四十年久。
13 「『至高的上主按呢講：四十年了後，我欲聚集受放逐的埃及人，
14 導𪜶對受掠的所在轉來𪜶的本居地巴特羅。佇遐，𪜶欲成做弱小的國家，
15 是列國中上微細的，𣍐當閣統治別個國家。我欲互𪜶衰荏，𣍐當閣管轄別個國家。
16 埃及𣍐當閣做以色列的靠山，只有互以色列人想起𪜶倚靠埃及的罪過。按呢，𪜶就知我是至高的上主。』」
尼布甲尼撒王欲征服埃及
17 第二十七年正月初一，上主對我講：
18 「人子啊，巴比倫王尼布甲尼撒導伊的大軍攻打泰爾。巴比倫王及伊的軍隊出力苦戰，逐個人攏落頭毛，肩頭㨨皮，毋拘𪜶攏無對泰爾得著什麼。
19 所以，我 — 至高的上主按呢講：『我欲將埃及的土地交互巴比倫王尼布甲尼撒。伊欲搶埃及的財物，將𪜶的資源搶了了；諸個戰利品欲做伊的軍隊的報賞。
20 我欲給埃及交互伊，當做伊的工錢，因為伊的軍隊是為我做工。我 — 至高的上主按呢宣布。』
21 「彼時，我欲互以色列強盛，嘛欲互你以西結閣再開嘴佇𪜶中間講話。按呢，𪜶就知我是上主。」
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。