上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
出埃及記
21
對待奴隸的條例
( 申 15:12-18 )
上主對摩西講：「你著為人民定諸個規例：
2 「你若買希伯來人做奴隸，伊通服事你六年久，第七年伊會當免付贖金自由離開。
3 伊若單身來，就單身離開；伊若有娶某來，伊的某就及伊做夥離開。
4 伊的主人若給伊娶某，某給伊生子抑是查某子，某及子兒著歸主人；伊著單身出去。
5 奴隸若明明講：『我疼我的主人、我的某，及我的子兒，無愛出去做自由人。』
6 伊的主人就著導伊去審判官遐，互伊倚門抑是門徛，用鑽仔鑽伊的耳仔；伊就永遠服事主人。
7 「若有人賣查某子做奴隸，查某囝仔贖身的條例及查甫奴隸無像。
8 主人若娶伊，後來無合意，著准伊贖身；主人既然無守信用，就無權將伊賣互外族人。
9 主人若給伊娶來做新婦，就著給伊當做查某子款待。
10 主人的子若閣娶，彼個女奴隸的食、穿，及作某的權利，猶原𣍐用得減少。
11 若無對伊盡此三項義務，伊就通免付贖金自由離開。」
暴力的刑罰條例
12 「拍死人的，一定著互伊死。
13 若毋是故意刣人，是上帝容允此件事發生，我就給恁設一個所在，互彼個人通走去遐。
14 人若惡意用計謀害死人，就是走去到我的祭壇遐，嘛著給伊掠起來處死。
15 「拍父母的，一定著互伊死。
16 「拐誘人的，無論給賣去，抑是猶佇伊的手，一定著互伊死。
17 「咒詛父母的，一定著互伊死。
18 「人若冤家，此個用石頭抑是拳頭母拍彼個，無給拍死，毋拘互伊受傷倒佇眠床；
19 若彼個人會閣起來，攑柺仔行路，此個拍伊的，通算無罪；毋拘著賠償伊𣍐當做工的損失，嘛著負責給伊醫到好。
20 「人若用棍摃伊的奴隸，奴隸無論是男的抑是女的，若連鞭死，主人一定著受刑罰；
21 若過一兩日才死，伊就免受刑罰，因為奴隸是伊的財產。
22 「人若相拍，傷害有身的婦仁人，致到流產，毋拘無別項的傷害，彼個人著照婦仁人的丈夫的要求，經過審判官的裁決，賠償。
23 若有其他的傷害，彼個人著用命賠命，
24 目睭賠目睭，嘴齒賠嘴齒，手賠手，腳賠腳，
25 燒傷賠燒傷，傷害賠傷害，拍傷賠拍傷。
26 「人若給伊的奴隸拍歹一蕊目睭，奴隸無論是男的抑是女的，主人著因為彼蕊目睭放伊自由。
27 若給奴隸拍斷一支嘴齒，奴隸無論是男的抑是女的，主人著因為彼支嘴齒放伊自由。」
所有人的責任
28 「牛若觸死查甫人抑是婦仁人，著用石頭給彼隻牛抌死，毋拘毋通食伊的肉；牛的主人算無罪。
29 彼隻牛若平時就會觸人，有人給牛的主人警告，主人竟然無給牛縛好勢，煞互彼隻牛觸死人，就著用石頭抌死彼隻牛；牛的主人嘛著死。
30 若是裁決會當用銀贖回彼個主人的性命，伊著照所裁決的錢額繳納。
31 牛無論觸著人的子抑是查某子，著照此個規例辦理。
32 牛若觸著奴隸，無論是男的抑是女的，牛的主人著用三百四十公克的銀互奴隸的主人；牛嘛著用石頭抌死。
33 「人若徙開井蓋，抑是開井無蓋蓋，煞害牛抑是驢仔跋落彼內面，
34 井的主人著用銀賠償牲生的主人；死的牲生歸井的主人。
35 「人的牛若觸死別人的牛，活的牛著賣掉，賣的價錢及死的牛攏著對半分。
36 主人若知伊的牛平時會觸人，竟然無給牛縛好勢，伊就著用牛賠牛；死的牛歸伊家己。」
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。