上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
以西結書
27
為泰爾悲傷的哀歌
上主對我講：
2 「人子啊，你著為泰爾唱哀歌。
3 你著對佇海口，及佇真多沿海的島嶼做貿易的泰爾講：『至高的上主按呢講：
泰爾啊，你曾誇口
家己是十全十美的城市。
4 你擴展你的邊界到海的中心；
你受起造親像一隻完美的大船。
5 𪜶用黑門山的松樹做船枋，
用黎巴嫩的柏香樹做船桅，
6 用巴珊的橡樹做槳，
用塞浦路斯的黃楊木，鑲象牙做床枋。
7 𪜶用埃及繡花的幼麻布做帆，
人對遠遠就看會著。
𪜶用以利沙沿岸運來的藍色、紫色的布料做布棚。
8 為你划船的是西頓人及亞發人；
為你按舵的是泰爾本地的高手。
9 修理船的是迦巴勒老練的師傅；
大海來往的船隻及船員攏來你遮做生理。
10 「『你倩波斯人、呂底亞人，及弗人來你的軍隊做戰士。𪜶給盾牌及頭盔掛佇你的營房，加添你的威風。
11 對亞發倩來的戰士為你守衛城牆；你的城樓嘛有迦瑪底人啲顧守。𪜶給盾牌掛佇你的壁頂，互你閣較壯觀。
12 「『他施人因為你的物件真多就來交關，用銀、鐵、錫，及鉛，交換你的商品。
13 希臘人、土巴人、米設人及你做生理，用奴隸及銅器交換你的貨物。
14 陀迦瑪人用馬、戰馬，及騾，交換你的貨物。
15 底但人及你做生理，真多海島的住民嘛是你的顧客；𪜶用象牙、烏檀木及你交換貨物。
16 亞蘭人因為你的物件真多就來交關，用綠寶石、紫色布、繡花布、幼麻布、珊瑚，及紅寶石，交換你的商品。
17 猶大人、以色列人攏及你做生理，用米匿的麥、餅、蜜、橄欖油、乳香交換你的貨物。
18 因為你的物件真多，大馬士革人用黑本的酒及白羊毛及你交易，
19 用烏薩的酒、精煉的鐵、桂皮、芳的菖蒲，及你交換貨物。
20 底但人用苴馬鞍的毯仔交換你的貨物。
21 阿拉伯及基達所有的領袖用羊羔、綿羊、山羊交換你的貨物。
22 示巴及拉瑪的生理人用高級香料、珠寶、黃金交換你的商品。
23 哈蘭、干尼、伊甸、示巴的生理人、亞述、基抹攏來及你做生理。
24 𪜶將上等的衣服、繡花的紫色布、彩色的地毯，用索仔縛甲真好勢，帶來市場及你買賣。
25 他施的船隊給你運送貨物。
你親像海裡的大船，
貯滿貨物，食水真深。
26 划船的給你划到外海；
東風佇海中給你搧破。
27 船破沉落去的時，
你的財寶、商品、貨物、
船員及按舵的、
修理船的、負責買賣的、
船頂的軍人及所有的人，
攏沉落海底。
28 船沉落海的時，船員喝救命的聲，
附近沿海的人攏著驚。
29 「『划船的、船員，及按舵的，
攏欲落船上岸。
30 𪜶欲為著你出聲大哭，
頭殼糝土粉，佇火灰中翱來翱去。
31 𪜶為著你剃光頭，
穿麻衫，
傷心哀哭，痛苦到極。
32 𪜶為著你啼哭哀傷的時，
為你唱哀歌：
有叨一座城親像泰爾，
沉落海底無聲無說？
33 你佇海裡送貨，
互列國充足。
你的財富及商品真多，
互世間的君王好額。
34 你佇大海互湧挵破，
所有的貨物及船員
攏沉落去海深的所在。
35 「『海島的住民攏因為你的結局著驚；𪜶的君王嘛攏驚惶恐惶，面帶憂容。
36 列國的生理人給你幌頭恥笑；你永遠消失，此款的結局互人著驚。』」
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。