上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
以西結書
26
譴責泰爾
第十一年某一個月的初一，上主對我講：
2 「人子啊，因為泰爾人向耶路撒冷講：『哈哈，彼個及萬國做貿易的城已經毀壞啦！生理攏變做阮的啦！伊欲衰微，阮欲繁榮！』
3 「所以，我 — 至高的上主按呢講：泰爾，我欲及你作對！我欲召集列國，互𪜶親像海湧夯起來攻打你。
4 𪜶欲毀壞你的城牆，拆毀你的城樓。我嘛欲給所有的土攏耙清氣，賰光滑的石磐。
5 海中的泰爾欲變做曝魚網的所在。我 — 至高的上主按呢宣告。伊欲成做列國的獵物，
6 伊周圍城鎮的住民欲互刀劍刣死。按呢，𪜶就知我是上主。
7 「至高的上主按呢講：我欲召列國之王，巴比倫王尼布甲尼撒，帶領戰馬、戰車、馬兵，對北方來攻打泰爾。
8 你周圍城鎮的住民嘛攏欲受剿滅；對敵欲造土堆，起高台，攑盾牌攻打你。
9 伊欲用挵城的槌攻破你的城牆，用鐵器拆毀你的城樓。
10 伊大群戰馬絞起來的土粉欲給你遮蓋。伊的馬兵及戰車發出的聲互你的城牆振動。伊欲入你的城門，親像人對破隙的城牆入去。
11 伊的馬兵欲踐踏你的大街小巷，用刀劍刣死你的人民。你的神廟堅固的大柱欲倒佇土腳。
12 對敵欲搶你的財寶，奪你的貨物，捙倒你的城牆，拆毀你媠的厝宅，給石頭、柴、土攏㧒落海。
13 我欲互你𣍐當閣唱歌，人𣍐當閣聽見你彈琴的聲。
14 我欲互你變做光滑的石磐，做曝魚網的所在；你無可能閣重建。我 — 至高的上主按呢宣告。」
15 至高的上主閣對泰爾講：「你的人民受屠殺，受傷哼哼呻的時，沿海的住民豈𣍐因為聽見你倒壞的消息驚甲皮皮惙？
16 沿海國家的君王攏欲離開𪜶的座位，給王袍及繡花的衫褪起來，坐佇土腳，一直驚惶愕愕惙；你的結局互𪜶攏愣去。
17 𪜶欲為你唱哀歌：
啊，你此個出名的城，
現在竟然滅亡啦！
你曾稱霸海上；
你及你的人民曾互所有住佇沿海的人驚惶。
18 你受毀滅彼日，
海島欲愕愕惙；
住佇遐的人攏欲因為你的消滅驚惶。」
19 至高的上主按呢講：「我欲互你荒廢親像無人徛起的城。我欲用深淵的水蓋過你，用大水淹密你。
20 我欲互你及落深坑的人，做夥落去古早死去的人遐。我欲互你及落深坑的人住佇地深、古早就荒廢的所在。你𣍐當閣佇人間展威。
21 我欲互你抵著恐怖的結局，你無閣存在；人欲尋你，永遠尋𣍐著。」至高的上主按呢宣告。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。