上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
以西結書
20
以色列人背逆
第七年五月初十，有幾個以色列的長老來坐佇我的面前，欲知上主的旨意。
2 彼時，上主對我講：
3 「人子啊，你著給以色列的長老講，至高的上主按呢講：『恁來欲求問我的旨意是無？我指我永遠的活命立誓：我無欲互恁問。』至高的上主按呢宣布。
4 「人子啊，你欲審問𪜶是無？若是，著互𪜶知𪜶的祖先所做可惡的事。
5 你著給𪜶講，至高的上主按呢講：『我揀選以色列人做我子民的時，佇埃及地互𪜶識我；我對雅各的後代立誓講：我是上主 — 恁的上帝。
6 彼時，我應允欲導𪜶出埃及，到我為著𪜶選定彼塊流奶及蜜的地，是萬國中上肥閣媠的地。
7 我給𪜶講：恁逐個人著放拺恁的目睭所合意許個通厭惡的偶像；毋通拜埃及的假神來拍垃墋家己，因為我是上主 — 恁的上帝。
8 毋拘𪜶背逆我，毋聽趁我。𪜶無放拺所合意許個通厭惡的偶像，嘛無棄拺埃及的假神。彼時，我想欲佇埃及將我全部的受氣攏摒佇𪜶身上。
9 總是我無按呢做。我無欲互我的名佇𪜶徛起的列國中受褻瀆；因為我曾佇𪜶徛起的列國人民的面前對𪜶講，我欲導𪜶出埃及。』
10 「所以，我導𪜶出埃及，給𪜶導到曠野。
11 我將我的規例賜互𪜶，將我的命令教示𪜶，互遵行的人攏通保存性命。
12 我閣將我的安歇日賜互𪜶，做我及𪜶立約的記號，互𪜶知，我是給𪜶分別作聖的上主。
13 毋拘，以色列人煞佇曠野背逆我，無遵守我的規例，拒絕我的命令；遵行的人才會當保存性命。𪜶徹底違犯安歇日。因為按呢，我想欲佇曠野將我全部的受氣攏摒佇𪜶身上，給𪜶消滅。
14 總是我無按呢做。我無欲互我的名佇𪜶徛起的列國中受褻瀆；因為我曾佇𪜶徛起的列國人民的面前對𪜶講，我欲導𪜶出埃及。
15 所以，我佇曠野向𪜶立誓，無欲導𪜶入去我欲賜互𪜶彼塊流奶及蜜的地，就是萬國中上肥閣媠的地。
16 因為𪜶棄拺我的命令，無遵守我的規例，違犯我的安歇日，去拜𪜶家己的偶像。
17 「雖然按呢，我猶原可憐𪜶，無佇曠野給𪜶攏總消滅。
18 我佇曠野給𪜶的兒女警告，毋通遵趁𪜶的祖先所定的規例，毋通守𪜶的命令，毋通拜𪜶的偶像來拍垃墋家己。
19 我是上主 — 恁的上帝。恁著順趁我的規例，遵行我的命令；
20 著守安歇日做聖日，做我及恁立約的記號，互恁知我是上主 — 恁的上帝。
21 「毋拘，𪜶的兒女嘛背逆我。𪜶無順趁我的規例，無遵守我的命令，違犯安歇日；遵行的人才會當保存性命。我想欲佇曠野將我全部的受氣攏摒佇𪜶身上。
22 毋拘，我給我的手勼倒來。我按呢做，是無欲互我的名受侮辱，因為列國的人民攏有看著我給以色列人對埃及導出來。
23 我閣佇曠野向𪜶立誓：我欲給𪜶放逐去外邦，四散佇列國，
24 因為𪜶無遵守我的命令，棄拺我的規例，違犯安歇日，敬拜𪜶祖先的偶像。
25 「後來，我歸氣將無好的規例，𣍐當互人得著活命的命令互𪜶；
26 互𪜶燒家己的大子獻做祭來拍垃墋家己。我欲互𪜶驚惶，𪜶就知我是上主。
27 「所以，人子啊，著給以色列人講，至高的上主按呢講：『恁的祖先對我不忠，褻瀆我。
28 我導𪜶到我應允欲互𪜶的土地。𪜶一下看著高的山及發甲真艷的樹，就佇遐獻祭；𪜶佇遐獻芳芳的祭物及奠酒祭，惹我受氣。
29 我問𪜶：恁去彼個高的所在叫做什麼？此個所在到今仔日猶叫做巴麻。』
30 所以，你著給以色列人講，我 — 至高的上主按呢講：『恁欲繼續犯恁祖先所犯的罪來拍垃墋家己是無？欲繼續拜𪜶所拜可惡的偶像來犯姦淫是無？
31 恁到今仔日猶啲燒家己的兒女獻做祭，拜偶像來拍垃墋家己；以色列人，我豈會當互恁求問？我至高的上主指我永遠的活命立誓：我無欲互恁問。
32 恁心內想：阮欲親像列國，親像外族人，去拜柴頭及石頭。恁的心意絕對𣍐當實現。』」
上帝的刑罰及赦免
33 至高的上主講：「我指我永遠的活命立誓，我欲作王，伸出大權能的手治理恁，欲將我的大受氣摒佇恁身上。
34 我欲伸出大權能的手，用摒出來的大受氣，將恁對萬民中導出來，對分散去的列國聚集恁。
35 我欲給恁導去外族人的曠野，當面給恁審問。
36 我早前按怎佇埃及的曠野刑罰恁的祖先，現在欲照按呢給恁刑罰。至高的上主按呢宣告。
37 「我欲嚴嚴管教恁，親像顧羊的牧者管理羊群，互恁遵守我的約。
38 我欲對恁中間除去背逆及得罪我的人；我欲給𪜶對寄居的所在導出來，毋拘𪜶𣍐當轉去故鄉以色列。按呢，恁就知我是上主。
39 「關係恁，以色列人啊，至高的上主按呢講：『隨在恁，恁若無欲服從我，做恁去拜恁的偶像！毋拘恁𣍐用得閣獻祭互偶像來褻瀆我的聖名。』
40 至高的上主講：『恁所有的以色列人欲佇我的聖山，就是以色列的高山敬拜我。我欲接納恁，閣愛恁帶祭物、初熟的農產物，及一切神聖的禮物來獻互我。
41 我欲對萬族的中間給恁導出來，給恁對四散去的列國聚集倚來；彼時，我欲接納恁親像接受芳芳的祭物；列國欲因為恁知，我是神聖的。
42 我欲給恁導轉去恁的故鄉以色列，就是我應允欲互恁祖先的土地，彼時，恁就知我是上主。
43 恁欲佇遐想起以前所做一切拍垃墋家己的事，因為家己所做邪惡的事厭惡家己。
44 以色列人啊，我為著我的名無照恁的邪惡及恁所做的歹事給恁刑罰的時，恁就知我是上主。』至高的上主按呢宣布。」
尼革夫大火燒
45 上主給我講：
46 「人子啊，你看南旁，給南方警告，對尼革夫的樹林講預言。
47 著給尼革夫的樹林講：『著聽上主所講的話。至高的上主按呢講：我欲佇恁遐放火，給樹林內所有的樹木，無論是青翠的抑是枯焦的，攏燒了了。猛烈的火焰拍𣍐化，對南到北，給地面的一切燒甲寸草不留。
48 逐個人攏會知，這是我上主放的火，一定拍𣍐化。』」
49 毋拘我講：「唉，至高的上主啊，叫我做此款代誌。人攏按呢講我，此個人不時啲講幻古。」
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。