上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
以西結書
18 上主對我講：
2 「恁以色列人哪有此句俗語，講『老父食酸葡萄，子兒的嘴齒酸軟』？」
3 至高的上主按呢講：「我指我永遠的活命立誓：恁以色列人𣍐閣流傳此句俗語。
4 每一個人的性命攏是我的；父母的性命屬佇我，子兒的性命嘛屬佇我。什麼人犯罪，就彼個人死。
5 「若有人正直，行為公平正義：
6 伊無食山頭壇神廟的祭物，無向以色列人的家族神明求保庇，無侵犯別人的某，無及經期中的婦仁人同房，
7 無欺壓人，將欠債的人抵押的物還伊，無搶奪別人的物件，提食物互枵餓的人食，提衫互赤身露體的人穿，
8 借錢互人無提利息，無放重利，無做邪惡的事，照公道處理糾紛。
9 此種人服從我的規例，謹慎遵守我的命令，照起工做代誌；伊是正直的人，一定會當保存性命。」至高的上主按呢宣布。
10-11 「此個人若有子做強盜，刣人，做𪜶老父毋曾做過的歹代誌，食山頭壇神廟的祭物，侵犯別人的某，
12 欺壓困苦及散赤的人，搶奪別人的物件，扣留欠債的人抵押的物，向偶像求保庇，做通厭惡的事，
13 借錢互人提利息閣提重利。此種人豈會當保存性命？𣍐！伊做諸個可惡的事，一定著死；伊是自取滅亡。
14 「此個歹人若有一個子，此個子看見伊的老父所做一切的歹代誌，毋拘伊家己省察，攏無按呢去做。
15 伊無食山頭壇神廟的祭物，無向以色列人的家族神明求保庇，無侵犯別人的某，
16 無欺壓人，將欠債的人抵押的物還伊，無搶奪別人的物件，反轉提食物互枵餓的人食，提衫互赤身露體的人穿，
17 無傷害散赤人，借錢互人無提利息，無放重利；毋拘有遵守我的命令，服從我的規例。伊𣍐因為伊的老父所犯的罪死。伊一定會當保存性命。
18 伊的老父因為欺壓人，搶奪別人的物件，佇人民中間做歹代誌；伊會因為家己犯的罪死。
19 「恁啲問：『是按怎後生無因為老父所犯的罪受刑罰？』我的回答是：『後生做公平正義的事，謹慎遵守我的規例，伊一定會當保存性命。』
20 只有犯罪的人著死。後生毋免為著老父的罪受刑罰；老父嘛毋免為著後生的罪受刑罰。正直的人欲因為作好得著報賞；歹人欲因為作歹受刑罰。
21 「歹人若悔改，離開伊所犯一切的罪，謹慎遵守我的規例，做公平正義的事，伊就通保存性命，毋免死。
22 伊所犯一切的罪攏會受赦免；伊欲因為伊做的好事保存性命。
23 歹人死亡，豈是我 — 至高的上主所愛？毋是！我豈毋是愛𪜶離開歹路來保存性命？
24 「正直的人若離開正路去作歹，及歹人仝款做通厭惡的事，伊豈會當保存性命？𣍐當！伊早前所做的好事無准算。伊會因為背逆、犯罪來死。
25 「毋拘恁講：『主按呢處理無公道！』以色列人，注意聽，我按呢處理無公道噢？恁才是無公道！
26 正直的人若離開正路去作歹，伊死，是因為伊作歹。
27 歹人悔改，離開伊所犯一切的罪，做公平正義的事，伊欲救家己的性命。
28 伊省察家己，悔改，離開伊所犯一切的罪，就會當保存性命，毋免死。
29 以色列人啊，恁講：『主的作法無公道！』恁想講我的作法無公道噢？恁的作法才是無公道！
30 「所以，以色列人，我 — 至高的上主按呢講：我欲照恁逐個人的行為審判恁。恁著悔改，離開恁所犯一切的罪，才免恁因為家己的罪受毀滅。
31 著放拺恁所做一切的歹事，換一粒新的心、新的神！以色列人，恁是按怎愛欲死？
32 我無愛有人死。恁悔改就會當保存性命。」至高的上主按呢宣布。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。