上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
以西結書
14
上帝責備拜偶像
有幾個以色列人的長老來尋我，坐佇我的面前。
2 彼時，上主對我講：
3 「人子，諸個人的心轉向偶像，跋倒犯罪。我豈通回應𪜶的祈求？
4 「你著給𪜶講：『至高的上主按呢講：以色列人若心轉向偶像，跋倒犯罪，閣來尋求先知，我上主欲照𪜶拜偶像的罪給𪜶報應。
5 我按呢做是欲互𪜶的心轉向我，因為偶像互以色列人離開我，及我疏遠。』
6 「所以，你著給以色列人講：『至高的上主按呢講：著回頭，棄拺恁的偶像，心離開所有通厭惡的事。』
7 「無論是以色列人，抑是住佇𪜶中間的外族人，若離開我，心轉向偶像，面向會互𪜶跋倒的罪，才來先知遮求問我，我上主欲親身報應伊。
8 我欲變面及伊作對，互伊成做人的鑑戒及笑談。我欲對我的子民中給伊革出。按呢，恁就知我是上主。
9 「若有先知受迷惑講預言，準講是我上主互伊受迷惑，我嘛欲伸手刑罰伊，給伊對我的子民以色列人中間消滅。
10 𪜶著對家己的罪負責任；求問的人的刑罰及先知的刑罰像款。
11 按呢，以色列人才𣍐閣迷失離開我，𣍐閣犯罪互家己受污染。𪜶欲做我的子民；我欲做𪜶的上帝。至高的上主按呢宣告。」
挪亞、但以理、約伯
12 上主對我講：
13 「人子，若有一個國家犯罪背逆我，我欲伸手切斷𪜶糧食的來源，互飢荒臨到，人及牲生攏餓死；
14 準講挪亞、但以理、約伯三個人攏住佇遐，𪜶的正直干焦會當救𪜶家己。至高的上主按呢宣布。
15 「我若互野獸行透此個所在，四界踐踏，咬死住民，互地拋荒，互人毋敢對遐經過。
16 我 — 至高的上主指我永遠的活命立誓，準講彼三個人住佇遐，𪜶嘛𣍐當救𪜶的子兒；𪜶干焦會當救家己，土地猶原拋荒。
17 「抑是，我若互彼所在抵著戰亂，人及牲生攏互刀劍刣死，
18 我 — 至高的上主指我永遠的活命立誓，就是彼三個人住佇遐，𪜶嘛𣍐當救𪜶的子兒；𪜶干焦會當救家己。
19 「抑是，我發極大的受氣，互瘟疫佇彼所在流行，將人及牲生攏滅絕，
20 雖然有挪亞、但以理、約伯住佇遐，我 — 至高的上主指我永遠的活命立誓，𪜶嘛𣍐當救𪜶的子兒；𪜶的正直干焦會當救𪜶家己。
21 「至高的上主按呢講：我若用戰亂、飢荒、野獸，及瘟疫此四種可怕的災難刑罰耶路撒冷，將人及牲生攏除滅，按呢豈毋是閣較嚴重？
22 若有人活落來，將𪜶的後生查某子導來恁遮，恁看見𪜶的所行所做，就會明白我按呢刑罰耶路撒冷是應該的，
23 嘛會了解我所做的毋是無理由。至高的上主按呢宣告。」
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。