上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
以西結書
12
先知扮演難民
上主對我講：
2 「人子，你住佇背逆的人中間。𪜶有目睭，毋拘無欲看；有耳孔，毋拘無欲聽，因為𪜶攏是背逆的人。
3 「所以，人子，你著準備受放逐的時所需要的包袱仔，當頭白日，佇𪜶的目睭前離開你住的所在去別位；𪜶雖然背逆，可能會因為你的行動覺醒。
4 你著佇日時，佇𪜶的目睭前，提你款好佇受放逐的時欲用的包袱仔出去。到黃昏，你著佇𪜶的面前親像受放逐的人離開。
5 你閣著佇𪜶猶啲看的時，給你厝的壁挖孔，對彼孔捾包袱仔出去。
6 到天暗的時，你著佇𪜶面前給包袱仔揹佇肩頭行出去。你閣著給你的面蓋起來，看𣍐著此塊地；我欲互你成做我刑罰以色列人的兆頭。」
7 我就照上主的命令做。彼日，我佇日時將款好佇受放逐的時欲用的包袱仔提出來。到黃昏，我用手給壁挖孔；天暗的時，佇眾人的面前揹包袱仔離開。
8 隔早起，上主對我講：
9 「人子，許個背逆的以色列人若問你：『你啲創啥？』
10 你著給𪜶講：『至高的上主按呢講：這是有關佇耶路撒冷的王及所有以色列人的信息。』
11 你著給𪜶講：『我就是恁的兆頭。我所做的欲發生佇恁身上。恁欲受掠，受放逐。
12 恁的王欲佇天暗的時，揹包袱仔對為著伊挖的壁孔出去。伊的面欲蓋啲，看𣍐著此塊地。』
13 我欲拋網給伊掠起來，掠去巴比倫。伊看𣍐著彼個所在，路尾會死佇遐。
14 我欲給伊的軍隊及四周圍所有幫贊伊的人，趕散去東西南北逐所在，嘛欲拔刀追殺𪜶。
15 「我給𪜶趕散去列國，給𪜶放逐去逐所在的時，𪜶就知我是上主。
16 毋拘我欲給𪜶留一寡人，無死佇刀劍、飢荒、瘟疫。按呢，許個留落來的人欲佇受放逐的逐國，講起家己早前所做的歹代。按呢，𪜶就知我是上主。」
憂愁驚惶的兆頭
17 上主對我講：
18 「人子，你食飯的時著皮皮惙，飲水的時著驚惶不安。
19 你著對此所在的人民講：『這是至高的上主有關留佇以色列本國的耶路撒冷人民講的話：𪜶食飯的時會皮皮惙，飲水的時會驚惶不安；因為遐的住民無法無天，𪜶的土地會拋荒，無賰半項。
20 有人住的城鎮會荒廢，土地會拋荒。按呢，恁就知我是上主。』」
普通的俗語及特別的信息
21 上主對我講：
22 「人子，以色列人是按怎有俗語講『日子一日一日啲過，無一個異象實現』？
23 你著給𪜶講：『至高的上主按呢講：我欲互此句俗語無閣流行；以色列人𣍐閣講此句俗語。』你著給𪜶講：『時日逼近啦，所有的異象攏欲實現啦。』
24 「以色列人中間無欲閣有假的異象抑是人合意聽的預言。
25 我上主親嘴對𪜶講的話，一定會實現，𣍐延遲。背逆的人啊，我給恁講的話欲佇恁活啲的時實現。我 — 至高的上主按呢宣布。」
26 上主閣對我講：
27 「人子，以色列人欲講：『伊看見的異象是啲講真久以後的代誌，所講的預言攏是指遙遠的將來。』
28 所以，你著給𪜶講：『至高的上主按呢講：我的話無一句會延遲；我講的話一定實現。』我 — 至高的上主按呢宣布。」
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。