上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
以西結書
11
耶路撒冷受定罪
上帝的神給我夯起來，帶我到上主聖殿向東旁的正門。我佇門的入口看見二十五個人，其中有押朔的子雅撒尼亞及比拿雅的子比拉提此兩個民間的領袖。
2 上帝給我講：「人子啊，𪜶就是佇城內圖謀邪惡，出歹主意的人。
3 𪜶講：『現在猶毋是起厝的時。此座城親像鍋仔，咱親像內面的肉。』
4 所以，人子啊，你著講，著宣講指責𪜶的話。」
5 上主的神臨到我。伊對我講：「你著給人民講：『上主按呢講：以色列人，恁啲講什麼，啲想什麼，我攏知。
6 恁佇此個城刣死即多人，屍體滿街路。』
7 「所以，我 — 至高的上主按呢講：此座城就是鍋仔，鍋仔內的肉就是恁佇城內刣死的人的身屍。我欲給恁趕出此個城。
8 恁驚刀劍，我欲用刀劍攻擊恁。這是至高的上主講的。
9 我欲給恁趕出此個城，將恁交互外國人，閣給恁審判。
10 恁欲死佇刀下；我欲佇以色列的邊界審判恁，按呢恁就知我是上主。
11 此座城無欲閣保護恁，親像鍋仔保護內面的肉。我欲佇以色列的邊界審判恁。
12 按呢，恁就知我是上主。恁無遵守我的規例，無順趁我的命令，顛倒照恁周圍列國的規矩去做。」
13 我抵啲宣講的時，比拿雅的子比拉提忽然死去。我面仆佇土腳大聲喝：「唉，至高的上主，你欲將以色列所賰的人攏消滅是無？」
上帝對受放逐的人的應允
14 上主對我講：
15 「人子啊，耶路撒冷的住民啲談論你的兄弟、你的親族、你的同胞，就是所有受放逐的以色列人。𪜶講：『許個受放逐的人離開上主真遠啦。上主已經將此塊土地賜互阮做產業。』
16 「所以，你著講：『至高的上主按呢講：我雖然將以色列人放逐去遙遠的列國，給𪜶分散佇逐所在，我猶原欲佇𪜶住的所在做𪜶暫時的聖所。』
17 「你著閣講：『至高的上主按呢講：我欲對萬民的中間召集恁，對恁四散去的逐所在聚集恁，將以色列的土地閣賜互恁。』
18 受放逐的人轉來的時，𪜶一定會除去所有通厭惡的偶像及通痛恨拜偶像的事。
19 我欲互𪜶合一的心，將新的神囥佇𪜶內面。我欲對𪜶的身軀除去親像石頭赫呢碇的心，閣賞賜𪜶親像肉赫呢軟的心。
20 按呢，𪜶就會遵守我的規例，順趁我的命令。𪜶欲做我的子民，我欲做𪜶的上帝。
21 毋拘心意愛通厭惡的偶像及意愛拜偶像的事許個人，我欲照𪜶的行為給𪜶刑罰。至高的上主按呢宣告。」
上帝的榮光離開耶路撒冷
22 基路伯搋開翼，輪仔隨佇𪜶身邊；佇𪜶的頂面有以色列上帝的榮光。
23 上主的榮光對城內升高，停佇城東旁的彼座山頂。
24 佇異象中，上帝的神給我夯起來，帶我去受放逐佇巴比倫的同胞遐。了後，我看見的異象離開我。
25 我就將上主指示我的逐項事攏講互受放逐的同胞聽。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。