上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
以西結書
4
表演耶路撒冷受圍困
上主講：「人子啊，你著提一塊磚仔囥佇你的面前，頂面畫一座城代表耶路撒冷，
2 閣佇城四周圍起高塔，造土堆，紮營，安挵城的槌。
3 然後，提一塊鐵枋𫞼佇你及城的中間做城牆。你著面對此座城，親像你啲圍攻城。這是我互以色列人的兆頭。
4 「你著倒倒旁來擔以色列人罪過的刑罰。你倒幾日，代表𪜶承受刑罰偌久。
5 我已經決定你倒的日數，代表𪜶背逆的年的數目，你著倒三百九十日，擔以色列國罪過的刑罰。
6 此個事了後，你著閣倒正旁四十日，擔猶大國罪過的刑罰。一日抵一年。
7 「你著面向受圍困的耶路撒冷城，露出手骨，講預言攻擊伊。
8 我欲給你縛起來，互你𣍐當翻身反旁，直到圍城的日子滿。
9 「了後，你著提一寡小麥、大麥、豆仔、扁豆、黍仔、粗麥，囥佇碗裡作餅，這就是你向倒旁倒的彼三百九十日的食物。
10 你每日食的量是兩百三十公克，逐日照時食。
11 你每日飲的水是半公升，逐日照時飲。
12 你著佇民眾面前，用人的糞做火柴烘餅來食，親像啲食大麥餅。」
13 上主閣講：「以色列人互我趕逐流亡佇外國的時，𪜶會親像按呢食律法所禁止無清氣的食物。」
14 毋拘我應講：「至高的上主，我前到今毋曾違背清氣的條例，對細漢就無食自然死的，抑是互野獸拆裂的動物。我毋曾食禮儀上無清氣的食物。」
15 上帝給我講：「按呢好，你通用牛糞代替人的糞做火柴烘你的餅。」
16 伊閣講：「人子啊，我欲斷絕耶路撒冷的糧食。𪜶欲心存掛慮食配給的餅，帶驚惶飲受限量的水。
17 𪜶的糧食無夠通食，水無夠通飲；𪜶欲絕望驚惶，因為家己的罪惡衰荏來死。」
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。