上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
出埃及記
20
十條誡
( 申 5:1-21 )
上帝吩咐諸個一切的話，講：
2 「我是上主 — 你的上帝，有將你對埃及地，做奴才的家導出來。
3 「我以外你毋通有別個上帝。
4 「毋通為家己雕刻偶像，無論天頂、地上，及地下水內所有的物，攏毋通造𪜶的像；
5 毋通給𪜶跪拜，嘛毋通服事𪜶，因為我上主 — 你的上帝是要求全情服事的上帝；怨恨我的人，我追究𪜶的罪，對父到子，到三四代；
6 疼我，遵守我誡命的人，我施恩互𪜶，直到千代。
7 「毋通濫用上主 — 你的上帝的名；因為濫用上主的名的人，我上主一定無給伊當做無罪。
8 「著會記得安歇日，守做聖日。
9 六日內著拍拼做你所有的工課，
10 毋拘第七日是上主 — 你的上帝設立的安歇日；此日，你及你的子、查某子、奴僕、女婢、牲生，以及寄居佇恁中間的人，攏毋通做工，
11 因為六日久，上主創造天、地、海，及彼中間的萬物，第七日就歇睏；所以上主賜福安歇日，設立此日做聖日。
12 「著孝敬你的老父、你的老母，通互你佇上主 — 你的上帝賞賜你的地久長徛起。
13 「毋通害死人。
14 「毋通姦淫。
15 「毋通偷提。
16 「毋通作偽證陷害你的厝邊。
17 「毋通貪你的厝邊的厝，嘛毋通貪你的厝邊的某、奴僕、女婢、牛、驢，抑是你的厝邊任何的物件。」
人民驚惶
18 ( 申 5:22-23 )
所有的人民看著熠爁，聽著雷彈及哨角的聲，閣看著山頂淐煙，就愕愕惙，遠遠徛啲，
19 對摩西講：「請你給阮講就好，阮一定欲聽；毋通互上帝對阮講話，阮才免死。」
20 摩西對人民講：「毋免驚；上帝降臨是欲考驗恁，互恁常常敬畏伊，才免恁犯罪。」
21 人民遠遠徛啲；摩西行倚密雲，去上帝遐。
祭壇的條例
22 上主對摩西講：「你著給以色列人按呢講：『恁已經看見我對天頂及恁講話。
23 毋通為家己造任何金抑是銀的神像來及我比並。
24 著用土給我起祭壇，佇彼頂面獻燒化祭及平安祭，以及你的牛、你的羊；所有敬拜我的所在，我欲來遐賜福你。
25 你若用石頭給我起祭壇，毋通用拍過的石頭起；石頭若用傢俬拍過，就受拍垃墋。
26 毋通造崎仔層行上我的祭壇，才免露現你的下體。』」
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。