上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
出埃及記
19
佇西奈山
以色列人出埃及地了後，佇第三個月的初一來到西奈的曠野。
2 𪜶離開利非訂來到西奈的曠野，就佇彼個山的對面紮營。
3 摩西上山朝見上帝。
上主對山裡叫摩西，講：「你著對雅各的後代以色列人宣布：
4 『我對埃及人所做的事，恁攏有看著；嘛知我按怎親像鷹鳥用翼載恁，導恁來歸佇我。
5 今，恁若切實聽趁我的話，遵守我的約，就會佇列國中成做我的子民。全地攏是我的，
6 毋拘恁是歸屬我的，是祭司的國度，聖潔的國民。你著將諸個話對以色列人講。』」
7 摩西就去召集人民的長老，將上主命令的話攏給𪜶講。
8 人民齊聲應講：「上主所講的阮攏欲遵趁。」摩西就將人民的話回復上主。
9 上主給摩西講：「我欲佇密雲的中間來你遮，互人民聽見我及你講話，通永遠信任你。」
摩西將人民的話對上主講，
10 上主閣給摩西講：「你去人民遐，吩咐𪜶佇今仔日及明仔載著潔淨家己，閣叫𪜶洗衫，
11 準備迎接第三日。第三日，上主欲佇所有人民的面前，降臨佇西奈山。
12 你著佇山的周圍給人民定界限，講：『恁著謹慎，毋通上山，嘛毋通侵犯山的邊界；若有人侵犯此個山的邊界，一定著互伊死；
13 毋通給伊摸著，著用石頭給伊抌死，抑是用箭給射死。所有侵犯邊界的，無論是人抑是牲生，攏𣍐用得互伊活。』到哨角的聲拖長的時，𪜶才通上山。」
14 摩西落山去人民遐，吩咐𪜶著潔淨家己，閣叫𪜶洗衫。
15 伊對人民講：「著準備迎接第三日；毋通親近婦仁人。」
16 到第三日清早，山頂雷公熠爁，烏雲密布，號角的聲大彈；營內的人民攏愕愕惙。
17 摩西導人民離開營地，迎接上帝；𪜶攏徛佇山腳。
18 歸個西奈山攏是火煙，因為上主佇火中降臨佇山頂；山的火煙親像火爐的煙淐高，歸個山大振動。
19 哨角的聲愈彈愈大，摩西講話，上帝彈雷給伊應答。
20 上主降臨佇西奈山山頂；上主召摩西上山頂，摩西就𬦰上山。
21 上主對摩西講：「你落去警戒人民，叫𪜶毋通超過界線欲來遮看上主，致到會有真多人死。
22 親近上主的祭司嘛著潔淨家己，才免我給𪜶刑罰。」
23 摩西對上主講：「人民𣍐當上西奈山，因為你已經警戒阮，講：『著佇山的周圍設界限，給山分別作聖。』」
24 上主給伊講：「你落去，才閣及亞倫做夥上來；毋拘祭司及人民毋通超過界限欲來上主遮，才免我給𪜶刑罰。」
25 摩西就落山去人民遐，給𪜶宣布。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。