上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
以西結書
1 以西結看見第一個異象
上帝的寶座
第三十年四月初五，我及受放逐到巴比倫的猶太人做夥住佇迦巴魯河邊。彼時天拍開，我看見上帝的異象。
2 此個代誌發生佇約雅斤王受掠去巴比倫以後第五年。
3 佇巴比倫的迦巴魯河邊，上主對布西的子祭司以西結講話；上主賞賜伊氣力。
4 我啲觀看的時，看見大風對北旁掃過來；有一大片雲閣有閃熠的火，雲的四周圍光映映，對彼中間發出的火親像會熠的金屬赫呢光。
5 佇中央有出現四個活物：𪜶的形狀親像人，
6 逐個攏有四個面，四支翼；
7 𪜶的腳直直，腳蹄親像牛的蹄，光映映親像磨光的銅，
8 佇逐支翼股下面有人的手。四個面，四支翼是按呢：
9 𪜶的翼攏相連接；行動的時毋免轉身，攏會當對逐旁直行。
10 四個活物各有四款面：頭前的面親像人，正旁的面親像獅，倒旁的面親像牛，後面的面親像鷹。
11 𪜶的翼向頂面搋開，逐個活物的兩支翼及兩旁的活物的翼相接，另外兩支翼遮蓋家己的身軀。
12 逐個活物的面向前，照心意做夥行動，直行毋免轉斡。
13 諸個活物的形狀親像啲𤏸的火炭，嘛親像火把，火焰不斷佇活物中央來回徙位振動；火真光，對火的中間發出熠爁。
14 諸個活物前後闖來闖去，速度親像熠爁赫呢緊。
15 我啲觀看諸個活物的時，看見每一個有四個面的活物邊仔攏有一個輪仔佇土腳。
16 四個輪仔內外的形狀攏仝款，若親像每一個輪仔內面閣有一個輪仔；輪仔攏親像寶石發光。
17 此四個輪仔振動的時，攏會當向逐旁直行，毋免轉斡。
18 四個輪仔的輪框，高閣互人驚畏；框的外表攏是目睭。
19 諸個活物行動的時，四個輪仔隨佇邊仔轉踅；活物離開地面，輪仔嘛離開地面。
20 活物的心意欲去叨位，輪仔就去叨位，因為活物的心意控制輪仔。
21 當活物行動，輪仔嘛行動；活物停啲，輪仔嘛停啲；活物對地面升高，輪仔嘛對地面升高，因為活物的心意控制輪仔。
22 諸個活物的頭殼頂有穹蒼的形狀，親像啲發光，顯目的水晶佇𪜶的頭殼頂展開。
23 佇穹蒼下面，𪜶的翼直直搋開，及邊仔的活物的翼相連接，每一個活物用兩支翼遮蓋家己的身軀。
24 活物行動的時，我聽見𪜶的翼發出聲，聲親像大水嘩嘩哮，嘛親像軍隊啲造聲勢，閣親像全能上帝的聲。𪜶停止，徛啲的時，翼就垂落來。
25 毋拘活物停啲、翼垂落去的時，猶原有聲音對𪜶頭殼頂的穹蒼傳出來。
26 佇活物頭殼頂的穹蒼頂面，有一個形狀親像用藍寶石造的寶座；坐佇寶座頂的，形狀親像人。
27 我看見伊的腰頂高親像會熠的金屬赫呢光，四周圍親像啲𤏸的火；伊的腰以下親像火啲𤏸，四面發出光。
28 周圍的光輝親像落雨的時雲中的虹仝款。這就是上主顯現的時榮光的形狀。
上帝選召以西結作先知
我一下看見此個景象，就仆佇土腳。我閣聽見有人啲講話的聲。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。