上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
耶利米哀歌
1
耶路撒冷的悲傷
唉啊！此個早前人揢人的城市，
現在竟然拋荒。
早前佇列國受敬重的，
現在竟然親像寡婦。
早前佇逐城市做王后的，
現在竟然落魄甲做奴隸。
2 伊歸暝哀哭，滿面目屎。
早前的愛人，
現在無一個來安慰。
伊的朋友出賣伊，
變做伊的對敵。
3 猶大流亡佇外邦，
受苦，做苦工。
𪜶住佇列國，
𣍐當安然徛起；
𪜶受圍困，
無路逃脫。
4 迵到錫安的大路哀傷，
因為無人來過節；
所有的城門荒廢，
祭司哀嘆，
少女悲傷；
錫安鬱卒痛苦。
5 伊的對敵變做主人；
伊的仇人繁榮聳勢。
因為伊一遍閣一遍背叛，
上主互伊受苦；
伊的囝仔互對敵掠去。
6 錫安的榮華已經消失。
伊的領袖親像尋無草場的鹿；
𪜶閃避追趇𪜶的人，
毋拘無力通走。
7 耶路撒冷困苦流浪的時，
回想伊早前的榮華。
伊的住民落佇對敵的手頭，
無人救助伊。
對敵看見伊淪陷，
諷刺恥笑伊。
8 耶路撒冷犯大罪，
成做人的笑柄。
早前尊重伊的人，
看伊現在赤身露體，就藐視伊。
伊家己哀嘆，
見笑走去匿。
9 伊的污穢滒著伊的裙；
伊毋曾想著家己的結局。
伊的墮落互人著驚；
無人安慰伊。
上主啊，求你看我的苦難，
因為我的對敵啲對我聳鬚。
10 對敵伸手搶奪伊全部的財寶；
伊看著外族人侵入聖殿，
就是上主禁止𪜶入去的所在。
11 人民哀嘆吐氣，四界尋食，
為著救性命，提財寶換食物。
上主啊，求你俯落看，
看我變做即呢悲慘！
12 恁諸個過路人，恁豈攏無要緊？
恁四面觀察，
豈有人親像我按呢受苦楚？
這是上主大受氣的時互我承受的痛苦。
13 伊對頂面降火
佇我的骨頭內面啲燒。
伊設羅網纏我的腳，
互我跋倒退後。
伊放我孤單，
互我歸日悲慘。
14 伊將我罪過的軛
縛佇我的頷頸，
互我精力焦去。
主將我交佇我無力對抗的對敵手中。
15 主棄拺我所有的勇士；
伊召集大軍攻擊我，
硩碎我的少年人。
主踐踏我的人民，
親像佇酒窟踏葡萄仝款。
16 我為著諸個事啼哭，
我的目屎直直流。
無人佇身邊安慰我；
無人互我閣再得著氣力。
我的人民孤苦無助，
因為我的對敵刣贏我。
17 錫安伸雙手祈求，
毋拘無人安慰伊。
講著雅各，上主已經下令，
互四周圍的人成做伊的對敵；
𪜶將耶路撒冷看做污穢的物。
18 上主公義，
毋拘我違背伊的命令。
萬國的人民，請聽，
請看我所受的痛苦：
我的少女、我的青年攏受掠去！
19 我給朋友求援助，
毋拘𪜶欺騙我。
我的祭司及長老尋食欲救性命，
煞斷氣死佇城內。
20 上主，你看咧，
我即呢不幸痛苦！
我的腸仔絞滾，
我的心肝結歸球，
因為我大大背逆。
佇街路有凶殺，
佇厝內有死亡。
21 人聽著我哼哼呻，
毋拘無人安慰我。
對敵聽見我抵著的災禍，
攏因為你刑罰我來歡喜。
願你宣告的日子來到，
互對敵及我像款受苦難。
22 願你看見𪜶所做的邪惡，
給𪜶刑罰，
親像你因為我的罪過刑罰我像款。
我因為哀嘆無煞，
我的心神衰荏。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。