上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
出埃及記
18
葉特羅探訪摩西
摩西的丈人米甸的祭司葉特羅，聽見上帝為著摩西及伊的子民以色列所做的事，就是上主導以色列人出埃及的事。
2 葉特羅導摩西的婦仁人西坡拉來；摩西以前曾送伊倒去後頭厝。
3 葉特羅嘛導摩西兩個子來，一個叫做革舜，因為摩西講「我寄居佇外邦」；
4 一個叫做以利以謝，因為摩西講「我的祖先的上帝幫贊我，救我免死佇埃及王的刀下」。
5 摩西的丈人葉特羅導摩西兩個子及伊的婦仁人來到上帝的山，摩西佇曠野紮營的所在。
6 伊請人去給摩西講：「我是你的丈人葉特羅，導你的婦仁人及兩個子來你遮。」
7 摩西出去迎接伊的丈人，仆落去拜伊，給伊唚；𪜶互相請安，入去布棚。
8 摩西將上主為著以色列人對埃及王及埃及人所做攏總的事，以及𪜶佇路中所抵著一切的困難，及上主按怎解救𪜶，攏詳細講互伊的丈人聽。
9 葉特羅因為上主好款待以色列人，救𪜶脫離埃及人的手，就真歡喜。
10 葉特羅講：「上主應該受稱讚！伊有救恁脫離埃及人及埃及王的手。
11 今，因為上主有解救以色列人脫離埃及人的壓迫，我知上主比所有的神明閣較大。」
12 摩西的丈人葉特羅將燒化祭及祭物獻互上帝；亞倫及以色列的長老攏來，及摩西的丈人佇上帝的面前做夥食。
選派審判官
13 ( 申 1:9-18 )
隔日，摩西坐啲處理人民的案件；人民歸日徛佇摩西的邊仔。
14 摩西的丈人看著伊對人民按呢做，就講：「你哪按呢對待人民？哪會家己一個坐啲處理，互人民佇你的邊仔徛歸日？」
15 摩西對伊的丈人講：「這是因為人民來我遮欲求問上帝。
16 𪜶有案件來我遮，我就給𪜶判決，閣互𪜶知上帝的規例及律法。」
17 摩西的丈人給伊講：「你按呢做毋好。
18 你及你的人民攏會真悿。此個工作傷重，你家己一個做𣍐去。
19 今你著聽我的話。我給你建議，願上帝及你同在。你著代表人民到上帝面前，將案件請問上帝；
20 閣著將規例及律法教示𪜶，指示𪜶所著行的道路，著做的事。
21 不過，你嘛著對人民中間揀有才能，敬畏上帝，忠實可靠，怨恨不義之財的人，設立𪜶做官長，有的管一千人，有的管一百人，有的管五十人，有的管十個人；
22 互𪜶隨時裁決人民的案件；小的案件𪜶家己裁決，大的案件才送來你遮；按呢，𪜶會當給你分擔，你的負擔就會較輕。
23 你若按呢做，事實上帝嘛按呢吩咐你，你就接載會牢，諸個人民嘛會當安心倒去𪜶兜。」
24 摩西聽了就照伊丈人的話去做。
25 摩西對以色列人的中間揀有才能的人，設立𪜶做官長，有的管一千人，有的管一百人，有的管五十人，有的管十個人。
26 𪜶隨時裁決人民的案件；小的案件𪜶家己裁決，困難的才送去摩西遐。
27 後來摩西送伊的丈人出發，葉特羅就倒去伊的本所在。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。