上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
耶利米書
50
巴比倫受佔領
下面是關係巴比倫及巴比倫人的地，上主通過先知耶利米所講的話。
2 「著佇列邦傳報，向𪜶宣告；
著𫞼大旗，向列邦宣告。
毋通隱瞞，著講，
巴比倫啲欲淪陷啦！
伊的神明彼勒會真見笑，
馬杜克著青驚；
伊的神像攏真見笑，
伊的偶像攏著青驚。」
3 因為對北方有一國欲來攻擊巴比倫，欲互伊的地拋荒，無人閣佇遐徛起；連牲生嘛走了了。
以色列人回鄉
4 上主講：「時若到，以色列人及猶大人欲做夥，那行那哮，來尋上主 — 𪜶的上帝。
5 𪜶攏面向錫安，啲問欲去遐的路。𪜶欲來及上主立永遠的約，及伊結連。
6 「我的子民變做失迷的羊；𪜶的牧者導𪜶行迷路，互𪜶斡入去山內。𪜶對大山行到小山，尋無家己的羊椆。
7 抵著𪜶的欲給𪜶吞食；𪜶的對敵講：『阮按呢做無罪。這是因為𪜶得罪上主，就是𪜶真正通安歇的所在，嘛是𪜶列祖所向望的上主。』
8 「著離開巴比倫，逃走脫出巴比倫人的地，親像山羊走佇羊群的頭前離開。
9 我欲發動北方大國的聯盟做夥來攻擊巴比倫。𪜶欲排陣進攻，給巴比倫城攻破。𪜶的箭親像𠢕射箭的人所射的箭，逐支都射著目標。
10 巴比倫會互人搶，搶掠伊的攏搶甲心滿意足。」上主按呢宣布。
巴比倫淪陷
11 上主講：
「巴比倫人啊，恁搶我的產業，歡喜快樂，
閣跳來跳去，親像啲碖五穀的牛母，
親像勇猛的馬大聲哮；
12 恁的老母會非常見笑，
生恁的會感覺漏氣；
看咧，巴比倫會變做上弱小的國家，
變做焦燥無水的曠野。
13 因為上主發大受氣，
巴比倫一定無人徛起，
欲完全拋荒；
對遐經過的攏會著驚，
閣因為𪜶所抵著的災禍給𪜶恥笑。
14 「射箭的兵啊，著排陣包圍巴比倫城；
著向伊射箭，
毋免保惜恁的箭，
因為巴比倫得罪上主。
15 恁著佇巴比倫四圍喝喊：
『巴比倫已經投降啦！
伊的堡壘倒壞，
伊的城牆受拆毀啦！』
這是上主啲報仇，
恁嘛著對伊報仇；
伊按怎對待人，恁嘛著按呢對待伊。
16 撒種的及攑鐮𠠝仔收割的，
著攏給𪜶對巴比倫消滅。
為著欲閃避來侵犯的軍隊，
城內所有寄居的攏倒去本族，
走轉去家己的故鄉。」
以色列人回鄉
17 以色列是互獅趕散的羊；代先互亞述王吞食，後來互巴比倫王尼布甲尼撒遏斷骨頭。
18 所以上主 — 萬軍的統帥、以色列的上帝按呢講：「看咧，我欲刑罰巴比倫王及伊的國，親像我刑罰亞述王仝款。
19 我欲導以色列倒轉來𪜶家己的草埔；𪜶欲佇迦密及巴珊食草，閣佇以法蓮山區及基列地區享受遐所出產的五穀。
20 佇彼日，佇彼時，以色列的罪過查攏無，猶大的罪惡嘛尋無；因為我欲赦免我留落來的子民。」上主按呢宣布。
上帝審判巴比倫
21 上主講：「著上去攻擊米拉大翁的地
及比割的住民；
著給𪜶全部消滅，
照我所吩咐的一切去做。
22 巴比倫境內有交戰的聲，
閣有大毀滅。
23 拍全地的大支槌巴比倫，已經毀壞斷去啦！
列國看著攏著驚！
24 巴比倫啊，你對抗我上主，
所以我給你設活罩，
你互伊罩著竟然毋知；
你互人尋著，掠著。」
25 上主已經開武器庫，
佇受氣中攑出伊的武器；
至高上主 — 萬軍的統帥欲對付巴比倫。
26 恁著對逐個方向進攻；
開伊的粟倉，
給戰利品疊做堆，親像疊五穀；
全部毀滅，無留半項。
27 著刣𪜶所有的戰士，
給𪜶攏總消滅。
巴比倫慘啊！
𪜶受刑罰的日到啦！
28 對巴比倫逃走出來的難民講：「上主 — 咱的上帝佇錫安啲報仇，因為巴比倫人毀壞伊的聖殿。」
29 「著招集射箭的兵攻打巴比倫，佇伊的四周圍紮營，連一個都毋通互伊走去。著照伊的所做給伊報復；伊按怎對待人，恁嘛著按呢對待伊，因為伊驕傲背逆上主 — 以色列神聖的上帝。
30 𪜶的少年人會佇廣場互人刣死；仝彼日，𪜶的戰士會互人剿滅。」上主按呢宣布。
31 至高上主 — 萬軍的統帥按呢講：
「驕傲的人，你看，我欲攻擊你，
我對付你的時日已經到。
32 驕傲的人會跋倒，無人給伊扶起來；
我欲點火燒伊許個城鎮，
將伊四圍所有的全部燒毀。」
33 上主 — 萬軍的統帥按呢講：「以色列人及猶大人攏受欺壓；許個掠𪜶去的給𪜶掠牢牢，毋肯放𪜶走。
34 救贖𪜶的是上主 — 萬軍的統帥，我有大氣力，欲替𪜶申冤，互全地得著安歇，毋拘我會互巴比倫的住民大驚惶。
35 刀劍會來攻擊巴比倫人，
攻擊巴比倫的住民，
及𪜶的官員，以及有智慧的人。
上主按呢宣布。
36 刀劍會來攻擊術士，
𪜶會變做愚戇；
刀劍攻擊巴比倫的勇士，𪜶就驚惶。
37 刀劍會來攻擊伊的戰馬戰車，
以及所有住佇𪜶中間的外族人；
𪜶會親像婦仁人赫呢軟汫；
刀劍會來攻擊伊的財物，𪜶就受搶奪。
38 伊的河流因為曠旱焦硞硞；
伊是拜偶像的國家，
恐怖的神明互人癲狂。
39 「所以，曠野的走獸及豺狼欲住佇遐；鴕鳥嘛欲佇遐出入；毋拘遐無人住，永遠無人佇遐徛起。
40 抵親像所多瑪、蛾摩拉，以及𪜶附近的城鎮受上帝毀滅，巴比倫𣍐閣有人住，嘛𣍐閣有人佇遐寄居。我上主按呢宣布。
41 看咧，有一個民族欲對北方來；
有一個強的國家及真多君王對真遠的所在準備欲出征。
42 𪜶攑弓攑槍，殘忍無情；
𪜶的聲親像海湧嘩嘩哮。
巴比倫人啊，𪜶騎戰馬，
團結同心，
排陣欲攻擊你。
43 巴比倫王聽著此個消息，
手攏軟落去；
伊非常痛苦，
親像產婦啲催陣。
44 「我欲親像獅對約旦河邊的樹林出來，去攻擊青翠草埔的羊群，真緊給𪜶趕走，離開𪜶的國土。我揀選什麼人，就派伊統治此個國家。啥人會當及我比？啥人敢傳我出庭？叨此個統治者敢對抗我？
45 恁著聽上主攻擊巴比倫及伊的住民的計劃；𪜶連上弱小的都會互人拖去。我一定會互𪜶徛起的所在荒廢。
46 巴比倫倒壞的聲互地大振動；人哀哭的聲迵到列邦。」
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。