上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
耶利米書
37
西底家請耶利米為國家祈禱
巴比倫王尼布甲尼撒設立約西亞的子西底家代替約雅敬的子約雅斤作猶大王。
2 毋拘西底家、伊的人臣，及全國人民毋聽趁上主通過先知耶利米講的話。
3 西底家王派示利米雅的子猶甲、瑪西雅的子祭司西番雅去給先知耶利米講：「請你替阮祈求上主 — 咱的上帝。」
4 彼時，耶利米猶未互人關落監，猶會當佇人民的中間出出入入；
5 閣圍攻耶路撒冷的巴比倫軍隊忽然撤退，因為𪜶聽見法老已經派軍隊對埃及出發。
6 上主對先知耶利米講：
7 「你給𪜶講：『上主 — 以色列的上帝按呢講：恁著給派恁來求問我的猶大王按呢講：你看覓咧，許個出來欲援助你的法老軍隊會撤退倒去埃及。
8 巴比倫的軍隊一定會閣來攻打此個城，給伊佔領，放火燒。
9 上主按呢講，恁毋通自我欺騙，想講巴比倫人一定會離開恁。其實，𪜶𣍐離開。
10 就是講恁給來攻打的巴比倫全軍拍敗，賰一寡受傷的兵仔，𪜶嘛會對營房起來，放火燒此個城。』」
耶利米受掠入監
11 巴比倫軍隊為著欲閃避法老的軍隊，撤退離開耶路撒冷。
12 耶利米就對耶路撒冷出發去便雅憫地區，欲佇親族的中間繼承伊的產業。
13 伊去到便雅憫門的時，哈拿尼雅的孫，示利米雅的子守衛隊的官長伊利雅給耶利米掠起來，講：「你欲對巴比倫人投降乎。」
14 耶利米講：「你烏白講！我無欲去投降巴比倫人！」毋拘伊利雅毋聽，給伊掠起來，交互官員。
15 許個官員攏真氣耶利米，就給伊拍，給伊關佇宮廷書記官約拿單的厝，彼間厝已經改做監牢。
16 𪜶將耶利米關佇地牢幾若日。
17 西底家王派人去給耶利米導來，佇王宮私下問伊：「上主豈有給你講什麼？」
耶利米應講：「有！你會互巴比倫王掠去。」
18 閣給西底家王講：「我有得罪你什麼，抑是得罪你的人臣及諸個人民，你竟然給我關落監？
19 許個對你預言，講巴比倫王一定𣍐來攻打恁及此塊土地的先知，今佇叨位？
20 我的主，我的王，請你聽，允准我的懇求，毋通送我閣倒去書記官約拿單的厝；若無，我會死佇遐。」
21 西底家王就下令，給耶利米拘留佇護衛隊的埕，逐日對餅店街提一份麵包互伊，直到城內的麵包攏食了了；耶利米就按呢一直互人拘留佇護衛隊的埕裡。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。